Mozos e mozas de Down Coruña e persoal da compañía Vegalsa – Eroski compartiron unha mañá de limpeza na praia de Sabón (Arteixo), coa que se buscaba concienciar sobre a importancia do coidado do medio ambiente.

A xornada, realizada baixo a dirección de We Sustainability, comezou coas explicacións por parte dos monitores sobre o tema e, máis en concreto, da importancia do coidado de praias como na que se desenvolveu a actividade. Xuntos procederon a recoller lixo e plásticos no areal e debateron sobre como ese tipo de residuos puideron chegar ata alí.

O final da xornada tivo un punto lúdico e de desfrute da contorna natural, gozando dunha estupenda clase de surf. O obxectivo desta última parte do día era, precisamente, tomar conciencia de todo o que o mar e a súa contorna poden ofrecer durante o tempo de lecer.

Desde Down Coruña realízanse actividades de concienciación e coidado do medio ambiente de forma regular. De feito, a entidade conta cun programa chamado Ecofriendly21 que versa sobre formación na preservación do medio ambiente.