O pasado mes de xullo, a asociación Down Coruña, que actualmente dá servizo a 112 familias da cidade herculina e a súa comarca, revalidou o selo Dona con Confianza outorgado pola Fundación Lealtad. “Renovar periodicamente este distintivo supón reafirmarnos na nosa filosofía e na nosa maneira de actuar. En Down Coruña entendemos que debemos explicar á sociedade o que facemos cada ano. Para iso sometémonos a varios tipos de análises que nos obrigan a medir os nosos retos e as metas que alcanzamos con transparencia e rigor, o que nos permite tamén mellorar como organización”, indica José Rodríguez Díaz, coordinador xeral.

Durante este proceso, volveuse a contrastar que a asociación cumpre integramente os 9 Principios de Transparencia e Boas Prácticas. Estudáronse aspectos como o bo funcionamento do órgano de goberno da organización para o cumprimento das súas responsabilidades e o uso eficaz dos seus recursos, se a entidade é sostible e se a súa comunicación é fiable, así como a coherencia das súas actividades coa súa misión de interese xeral, entre outros aspectos. Neste sentido, segundo explica o coordinador xeral de Down Coruña, “a transparencia, a rendición de contas e a excelencia na xestión son entendidas pola nosa entidade como unha responsabilidade obrigatoria ante todas as persoas da base social que nos apoian, empresas colaboradoras e entidades públicas e privadas”.