A sede da Deputación de Pontevedra en Vigo (Rúa Eduardo Chao, 17, 36202 – Vigo) acollerá ata o vindeiro 27 de setembro a segunda colección do proxecto ‘A viaxe da miña vida’ da asociación Down Vigo. Nove láminas que suporán unha viaxe emocional para cada persoa que visite a mostra. Sentimentos, anhelos e lembranzas a través de nove historias únicas.
Trátase da segunda exposición acollida pola administración provincial trala exitosa experiencia de xaneiro de 2021, coa mostra de tapices elaborados en patchwork.
Nesta ocasión, a técnica da pintura ao pastel foi a elixida polo grupo de Habilidades Adaptativas da entidade para realizar esta segunda colección. Con esta exposición poderemos coñecer un pouco máis de cerca as historias de Antonio, Arancha, Lola, Lucía, Manuela, Marcelo, Mercedes, Noa e Silvia.
O proxecto ‘A viaxe da miña vida’ naceu para dar importancia ao aspecto emocional, tan necesario para traballar o envellecemento activo das persoas coa síndrome de Down e outras discapacidades intelectuais. Deste xeito, as profesionais Leticia Torres e Miriam Armada levan a cabo un traballo multidisciplinar para que tanto a persoa usuaria coma a súa familia poidan recibir unha intervención adaptada e individual. A través de experimentar con formas, texturas e cores, cada lámina reflicte un aspecto vital de cada participante. Nove experiencias vitais, nove historias, nove lenzos.