Hai 15 anos que Beatriz Silva forma parte do servizo de Emprego con Apoio da asociación Down Vigo. Acababa de pisar a entidade cando conseguiu o seu primeiro contrato, xusto no sector que anhelaba e para o que se formou: o traballo con nenos e nenas.
Esta experiencia inicial como acompañante de autobús escolar, durou case sete anos e proporcionou a Bea os primeiros ensinos sobre o mundo laboral: “Aprendín o que é un preparador laboral e a traballar con nenos, que é difícil”.
Tras este primeiro contacto, e á espera dunha nova oportunidade, Bea tiña claro que a súa meta era traballar “de calquera cousa que houbese en Emprego” e realizou prácticas como operaria téxtil, recepcionista e auxiliar de ludoteca. Aínda que non tivo inconveniente en probar en diferentes sectores, tiña clara a súa vocación e en 2016, tras realizar un curso de auxiliar de comedor, chegou a recompensa en forma de contrato de traballo. Ao principio, a previsión era dunha experiencia curta, pero resultaron ser 4 cursos, aínda que non tan ideais como Bea pensaba: “Ao principio estaba ben e gustábame o comedor cos nenos. Quería ter un traballo e gañar diñeiro para gastalo. Despois canseime. Ás veces poñíame moi nerviosa e non sabía que facer e empezou a deixar de gustarme”.
Tras esta experiencia, Bea trasladou ao Servizo de Emprego de Down Vigo que preferiría cambiar de sector, e mentres chegaba outra oportunidade, seguía no comedor escolar. Pero en marzo de 2020 chegou o confinamento por mor da pandemia por COVID-19, os colexios pecharon as súas portas e o tempo parouse para todos. Tamén para Bea, que tivo tempo para reflexionar sobre o seu futuro profesional, chegando á conclusión de que non quería continuar traballando no comedor nin nese sector.
Fixou a súa meta laboral no campo do comercio e comezou a trazar o seu propio camiño para poder alcanzar o seu obxectivo. O primeiro paso? Reunións co servizo de Orientación Laboral da Federación en busca de formación específica. Así chegou a oportunidade de cursar o certificado de profesionalidade “Actividades Auxiliares de Comercio”, onde as prácticas formativas resultaron motivadoras para ela e actuaron como motor para seguir. Con todo, as súas ganas toparon coa dura realidade ao non atopar oportunidades laborais. Tras unha curta experiencia en limpeza, Bea tivo que seguir esperando novas oportunidades.
2022: cambio de tendencia
Bea empezou o ano facendo prácticas nunha perfumería como axudante de dependenta. Era exactamente o perfil profesional no que quería medirse como traballadora. Aproveitou o momento para demostrar as súas ganas e a súa valía: “Na perfumería gustábame un pouco de todo: atender ao cliente, darlle consello… algún facíame caso!”.
Poucos meses despois, o empeño de Bea, xunto á súa perseveranza e ilusión, tiveron a súa recompensa: un contrato de traballo como auxiliar de comercio nunha importante cadea de roupa e complementos da cidade. Gústalle e séntese feliz. A súa familia está encantada de vela así e Nuria, a súa preparadora laboral, destaca o seu entusiasmo e aplaude a decisión de Bea de “estar aberta a calquera oportunidade laboral que se presente”.
A día de hoxe, Bea pode sentirse moi orgullosa e dicir que conseguiu chegar á meta que se propuxo. Desde Down Galicia desexámoslle moita sorte e énchenos de orgullo a súa valentía e a súa capacidade de decisión, fundamental para lograr a auténtica autonomía persoal.