A asociación Down Lugo e a Facultade de Administración e Dirección de Empresas da USC do campus lucense presentaron a pasada semana unha nova formación en competencias e habilidades empresariais para persoas usuarias da entidade social. Trátase do proxecto Troya, unha iniciativa que conta con apoio financeiro da Deputación Provincial de Lugo e a través da que se pretende que o mercado de traballo deixe de ser un espazo excluínte para as persoas con discapacidade, a fin de que este colectivo poida participar en todos os ámbitos da vida en igualdade de condicións que o resto da sociedade.
O acto de presentación contou coa presenza do vicerreitor de Organización Académica e Campus de Lugo, Francisco Fraga; a presidenta de Down Lugo, María José Blanco Freire; o deputado provincial delegado da área de Promoción Económica e Social, Pablo Rivera Capón; e o decano da Facultade de ADE, Roberto Bande Ramudo.
Neste novo proxecto social, promovido en colaboración co Servizo de Participación e Integración Universitaria (SEPIU) a través da Oficina de Voluntariado do Campus de Lugo, participarán oito persoas coa síndrome de Down ou outras discapacidades intelectuais usuarias da asociación Down Lugo, que contarán con dez sesións formativas presenciais que se desenvolverán todos os mércores desde o 19 de outubro ata finais de decembro na Facultade de ADE.
A inserción e inclusión laboral das persoas con discapacidade intelectual é o obxectivo principal do proxecto Troya, segundo salienta a profesora da USC e coordinadora deste proxecto, Ángeles López Cabarcos. Daquela, engade, a través deste curso para o desenvolvemento de habilidades buscamos mellorar a empregabilidade deste colectivo, ademais de traballar de xeito transversal outros obxectivos, tales como a mellora da autoestima, a aprendizaxe de competencias no uso e manexo de novas tecnoloxías e mesmo a adquisición de habilidades sociais. Deste xeito, a asistencia a clase antóllase como unha primeira parte do compromiso e do traballo a realizar polas persoas participantes, que tamén deberán manter un contacto co estudantado da Facultade de ADE que actuarán como mentores, establecer rutinas de estudo, relacionarse en novos ámbitos ou, entre outros, utilizar o transporte urbano.
O alumnado voluntario mentor facilitará apoio individualizado para un mellor aproveitamento do curso. A súa función será a de acompañar ao alumno ou alumna no seu proceso de aprendizaxe, servindo de guía na resolución de dúbidas.
Formación para a inclusión
A sesión de presentación do proxecto Troya serviu, asemade, para facer fincapé en que a formación, a cualificación profesional e as competencias a nivel tecnolóxico son factores a ter en conta para garantir as posibilidades de adaptación e inclusión das persoas con discapacidade no sempre cambiante entorno laboral. A esta realidade, cómpre engadir que a maioría das persoas con discapacidade intelectual carece de estudos superiores e, en consecuencia, deste tipo de capacitación, o que se traduce en menos oportunidades de emprego, sendo a inclusión laboral un dereito para as persoas con discapacidade e promove a súa participación na sociedade.
