Andrés acaba de dar, aos seus seis anos e sen sabelo, un paso de xigante en favor da inclusión das persoas coa síndrome de Down e outras discapacidades intelectuais. E é que as firmas de moda infantil La Martinica by María Sobrino e Paz Rodríguez acaban de contar con el como modelo para as súas campañas outono-inverno 2022.
Ambas as colaboracións chegan despois de moitos intentos e varias negativas. Como explica Merchi, nai de Andrés, “cando hai un anuncio pedindo modelos infantís pídenche enviar fotos, pero a realidade é que ás veces non temos nin resposta”. Por iso, é todo un logro a oportunidade dobre que se acaba de presentar. “As dúas marcas apostaron desde o primeiro momento por incluír a Andrés no seu catálogo”.
No caso da firma Paz Rodríguez a campaña é para o mercado internacional, na que os catálogos se personalizan por tallas e perfil. Neste caso, a colaboración de Andrés publícase en formato papel. Pola súa banda, La Martinica by María Sobrino ten como público obxectivo o mercado nacional cunha campaña en soporte dixital e papel.
Desde Down Galicia agradecemos ás dúas firmas o seu compromiso coa inclusión e a visibilización dos nenos e nenas coa síndrome de Down e outras discapacidades intelectuais, que esperamos sirva como exemplo e inspiración a outras marcas do sector.