“Felisa e Manolo”, unha terrorífica curtametraxe creada por 10 persoas usuarias de Down Pontevedra Xuntos, acaba de ser recoñecida co primeiro premio da categoría xeral do concurso “Curtas D-Medo 2022” do Concello de Barro, ao que concorreron xunto con outras seis pezas de gran nivel.

Abel, Jesús, Jessica, Laura Carballa, Iván, Elisa, Diego, Matías, Laura Pérez e Álvaro son os artífices desta creación audiovisual, centrada na malograda voda de Felisa e Manolo. Así, tras entregar o convite a unha amiga, quedan co cura para ultimar os preparativos, pero de camiño á igrexa teñen un accidente de coche no que morren os tres. Tralo enterro e no día no que se ían celebrar as nupcias, os noivos e o cura érguense das tumbas e celebran unha voda zombie.

Ademais da curta gañadora, os mozos e mozas de Xuntos presentaron tamén unha segunda peza que non foi premiada nesta ocasión. Para a preparación destas dúas curtametraxes dedicaron un total de sete sesións preparatorias: dúas para elaborar os guións, unha para organizar a gravación, dúas xornadas de toma de imaxes e dúas de montaxe e selección de músicas.

O proceso comezou cunha chuvia de ideas e, a partir das temáticas que foron xurdindo, decidiron o argumento principal, e dende aí comezaron a desenvolver e escribir os guións.

En canto ao proceso de gravación, as e os protagonistas contan que foi complicado, pero moi divertido. Había pouco tempo, coincidiu con días de choiva e incluso houbo que argallar un sistema para a escena do coche en movemento, xa que ningunha das persoas protagonistas conducía. Sen embargo, todo saíu adiante grazas ao traballo en equipo.

Ademais de mellorar as súas dotes interpretativas, con esta actividade puideron traballar outros temas como proxectar a voz, vocalizar, memorizar ou utilizar o galego, entre outros. E tamén houbo espazo para a improvisación, que sempre aporta material útil e interesante para a montaxe final. Posteriormente, co apoio de Luis e Sonia, técnicos da entidade, seleccionaron as escenas, escolleron a música e elaboraron a montaxe final das pezas.

O certo é que o pasaron xenial con esta experiencia, que están desexando repetir. De feito, xa están cavilando ideas para o certame do vindeiro ano.

En canto ao premio, consistente en 200€, acordaron repartilos entre todas as persoas participantes e gastalos en algo conxunto, como desfrutar dun día tomando algo e indo ao balneario de Cuntis.

O certame “Curtas D-Medo” foi creado hai 6 anos co obxectivo de dinamizar a creación en galego entre a poboación do Concello de Barro, explorar e dar a coñecer a creatividade audiovisual a través da gravación de curtas, fomentar o uso do galego nunha actividade actual e atractiva para o público mozo e ser un centro de transferencia e dinamización cultural.