A asociación Down Vigo acaba de renovar o seu acordo de colaboración coa Autoridade Portuaria da cidade, organismo que durante o próximos seis meses contratará a Tamara Carballa, participante do servizo de Emprego con Apoio da entidade, para que realice tarefas relacionadas co posto de auxiliar administrativo.
O obxecto deste convenio é a realización de prácticas na Autoridade Portuaria da cidade, potenciando así a inclusión socio-laboral a través de formación no posto de traballo.
Desta maneira, Down Vigo e a Autoridade Portuaria afianzan o seu compromiso de inclusión para que as persoas coa síndrome de Down e outras discapacidades intelectuais teñan acceso ao mercado laboral ordinario en igualdade de condicións que o resto da poboación.
Este acordo fíxose efectivo a pasada semana nun acto ao que asistiron Jesús Vázquez Almuíña, presidente da Autoridade Portuaria de Vigo; Roberto Campo, director de Down Vigo; e a propia Tamara Carballa.
