A través dun convenio de colaboración asinado o pasado mes de setembro, a Consellería de Política Social e Xuventude contribúe ao financiamento das actuacións que Down Galicia está a desenvolver nas súas sete entidades membro durante este ano 2022 no eido do envellecemento activo. As persoas beneficiarias son un total de 587 persoas coa síndrome de Down ou discapacidade intelectual a partir dos 20 anos.
Este acordo, que achega á Federación cen mil euros (100.000€), ten por obxectivo a realización dun proxecto de avaliación do envellecemento das persoas coa síndrome de Down e con discapacidade intelectual, que está a beneficiar a aqueles membros da Federación en etapa adulta e ás súas familias.
Deste xeito, asegúraselles a adecuación dos recursos de atención e avaliación nesta etapa, para facilitarlles maiores oportunidades de envellecemento activo e saudable que fomenten a súa independencia e autonomía persoal, así como a mellora da súa calidade de vida.
As actuacións desenvoltas durante o período de vixencia do convenio son:
- Revisión do fondo bibliográfico, rentabilizando os estudos, conclusións e liñas de actuación existentes. Todo o material é revisado e compartido entre os profesionais de Down Galicia que forman parte da comisión de envellecemento da Federación.
- Acollida e presentación do proxecto, facilitando toda a información relativa aos obxectivos, actuacións, motivación do deseño e posta en marcha do proxecto ás persoas destinatarias.
- Avaliación do envellecemento das persoas usuarias. Establecer protocolos de valoración e diagnóstico dos síntomas do proceso de envellecemento acelerado das persoas coa síndrome de Down e discapacidade intelectual a través da revisión do Protocolo de Avaliación e Seguimento do Envellecemento (protocolo ASE) e a súa aplicación.
- Análise de datos e de necesidades. Unha vez recollida a información segundo o establecido no protocolo, procederase a facer unha análise exhaustiva dos datos recompilados por parte de cada centro de traballo.
- Establecemento de liñas de actuación e recursos de apoio. Obtidas as conclusións en cada entidade, será imprescindible darlle unha continuidade a través da identificación dos recursos e apoios que se consideran necesarios para dar resposta á atención das necesidades.
A media da esperanza de vida das persoas coa síndrome de Down incrementouse de xeito significativo nos últimos anos, chegando incluso a superar os 60 anos. Os estudos amosan que as persoas con esta síndrome teñen un envellecemento prematuro, que comeza en torno aos 35 e 40 anos, e máis probabilidade de que este sexa patolóxico.
Por iso é necesario traballar en torno ao envellecemento activo do colectivo e á súa participación en recursos comunitarios para maiores e/ou especializados na atención a persoas con Alzheimer, garantindo o principio de inclusión, participación e igualdade de oportunidades tamén na etapa da vellez.
Por outra banda, tamén é fundamental avanzar no coñecemento das persoas maiores coa síndrome e Down e das súas particularidades, favorecendo así unha mellor e máis axustada atención, que garanta un benestar e que dita atención non sexa prexulgada e condicionada polo feito de ter síndrome de Down ou discapacidade intelectual.
O proxecto ten como conclusións cumprir os desexos dunha vida normalizada, as expectativas de continuación da autonomía e independencia na propia vivenda, e o derrube de barreiras relacionadas coa descoñecemento do colectivo e a presenza de estereotipos e crenzas erróneas que limitan a atención socio sanitaria.