Xa están á venda os calendarios solidarios de Down Coruña para o ano 2023!

Nesta ocasión, os almanaques están protagonizados polas persoas que traballan no Quiosco Down Experience, situado na Praza de Ourense da cidade coruñesa.

Desde hai varios anos, Down Coruña promove esta iniciativa de sensibilización co obxectivo de seguir reivindicando a diversidade e a inclusión das persoas coa síndrome de Down e outras discapacidades intelectuais na sociedade da que forman parte.

O presidente da Asociación Down Coruña, Ricardo Santos, confía na “solidariedade da xente coruñesa” para apoiar iniciativas relacionadas coa inserción laboral e social das persoas con calquera tipo de discapacidade. “O calendario é só unha peza máis do quebracabezas pola inclusión e, desde a nosa entidade, estamos seguros de que terá moi boa acepción”, subliña.

Os calendarios pódense adquirir no Corte Inglés de Catro Camiños, no Hipercor de Marineda City e no Fnac da Praza de Lugo.

Desde Down Coruña agradecen a colaboración de diferentes entidades da cidade herculina e do resto de Galicia como: Vegalsa, Bayfa, CYMA Informática, BlancoSan, Isla Consulting Coruña S.L., GADIS, COPASA, El Corte Inglés, Fnac, La Lavandería del Orzán, CONGALSA S.L., JG Profesional Tools S.L, Brico4pro, Nasauto Detail SL, Aceites Abril S.L., MANTENAE SL, Horno Sanbrandán, Dolco Uniformes, Ártabra Comunicación e SOAP.