Estefanía Lorenzo é unha moza de 29 anos, membro de Down Ourense, que a finais do pasado ano, tras superar un concurso-oposición, conseguiu unha praza fixa como persoal de servizos xerais do Servizo Galego de Saúde.
Concretamente, comezou a traballar no Centro de Orientación Familiar (COF) de Ribadavia, onde, tal e como ela mesma comenta, as súas tarefas son “levar as axendas de citación de catro profesionais diferentes, que son o traballador social, psicoloxía, matrona e xinecoloxía, dando citas polo ordenador, atendendo as chamadas telefónicas e dando citas de forma presencial”.
Estefanía asegura que “foi algo inesperado” porque “o día do exame puxeron preguntas bastante rebuscadas para que moitos suspenderan”, pero todo saíu ben porque dedicou moitas horas á preparación desta proba, “desde o ano 2019 ata abril de 2021”.
As súas preparadoras laborais en Down Ourense confirman que este gran éxito foi conseguido a base de moito esforzo e dedicación: “É unha persoa moi tenaz e constante, o que fai que se propoña un obxectivo e intente acadalo de tódolos xeitos posibles”.
Adquirindo tarefas coa metodoloxía de Emprego con Apoio
Estefanía afirma estar moi contenta no seu novo posto de traballo, no que xa ten preferencia por algunha tarefa: “O que máis me gusta é dar as citas co ordenador e o que menos atender as chamadas telefónicas”.
Para o perfecto desenvolvemento de todas estas tarefas conta co apoio das preparadoras laborais de Down Ourense, que a acompañarán ata o momento que ela o precise e se desenvolva con total autonomía. “O apoio que está a recibir Estefanía é o mesmo que se lle da a calquera das persoas que se incorporan a un posto na empresa privada, no que unha preparadora laboral acode a diario coa persoa usuaria ata que se adquiren as diferentes tarefas do posto e se vai sendo cada vez máis autónomo na realización das mesmas” explica Nuria Formoso, profesional da área de emprego de Down Ourense.
“Neste caso concreto, o apoio tamén o está a realizar unha compañeira que fai o mesmo traballo en O Carballiño e que acudirá a Ribadavia para formar a Estefanía e á súa preparadora laboral durante o tempo necesario”, aclaran desde Down Ourense. “Posteriormente, Estefanía e mais ela conformarán un equipo, xa que ambas desempeñan a súa labor no Centro de Orientación Familiar de Carballiño-Ribadavia, que se considera como un único centro, e van compartir tarefas cada unha na súa localidade”.
O traballo das preparadoras laborais tamén se centra na interacción da persoa que comeza a traballar cos seus novos compañeiros e compañeiras. Estefanía afirma que, nos días que leva, “aínda non me deu tempo a coñecelos a todos, pero coas persoas que levo tido contacto teño boa relación”.
Un longo percorrido que remata cun traballo para toda a vida
O camiño de Estefanía para conseguir unha praza fixa iniciouse no ano 2017, no que comezou a asistir en Down Ourense ás sesións de preparación de oposicións dos distintos procesos aos que se foi presentando. Ademais da de Persoal de Servizos Xerais do Sergas, na que acadou o seu obxectivo de obter un posto de traballo de carácter indefinido, a moza xa se presentara en dúas ocasións ás probas de subalterno da Xunta de Galicia, a un posto de uxier no Parlamento e para auxiliar de tarefas complementarias nunha convocatoria estatal.
Acudía á entidade tres tardes á semana para as clases presenciais, ata que chegou o COVID e estas pasaron a ser telemáticas. Isto fixo que o traballo dende a casa se duplicase, xa que non só era adaptarse á nova situación, senón tamén ao novo funcionamento das sesións.
Ao mesmo tempo que preparaba estes procesos selectivos, a moza continuaba traballando ata que a súa empresa entrou en ERTE por mor da situación derivada da pandemia, o que lle facilitou ter máis tempo para o estudo.
Ademais, Estefanía ten o certificado B1 de inglés da Escola Oficial de Idiomas, estudos que realizou porque lle parecía un complemento necesario para a súa profesión, e titulouse no grao medio de Xestión Administrativa.
No eido do emprego, esta é a terceira experiencia de Estefanía dende que no ano 2018 se incorporase ao mundo laboral despois de formarse en diferentes programas de Down Ourense. O seu primeiro traballo foi como axudante de cociña nun restaurante da cidade, no que Estefanía foi poñendo a proba todo o adquirido durante o tempo de formación na entidade, e no ano 2021 xurdiulle a posibilidade de incorporarase ás oficinas do Colexio de Avogados de Ourense como auxiliar administrativo na súa sede dentro do edificio do xulgado.
En palabras de Estefanía, a súa experiencia neste último posto foi “moi boa, xa que os compañeiros foron moi bos e trataron de axudarme no que podían. Facía tarefas como dar as togas aos avogados para os xuízos, fotocopias, selado de documentos, venta de lotaría do colexio polo Nadal, etc.”.
A realidade dunha vida autónoma e independente
Estefanía é unha rapaza con multitude de afeccións, entre as que destacan a lectura, as mascotas, as viaxes e o tempo en familia.
Pero unha das inquedanzas desta moza ourensá sempre foi poder vivir e desenvolverse de maneira autónoma e independente. De aí que xa leve un ano vivindo soa na cidade de Ourense, sentíndose “ben” con unha experiencia á que se acostumou “facilmente”.
Dende Down Ourense destacan “a capacidade de esforzo e superación por parte de Estefanía á hora de enfrontarse a novos retos laborais que lle permitisen acadar o obxectivo final de ser totalmente independente e ser capaz de dirixir a súa vida plenamente”.
Agora, tras comezar a traballar no COF de Ribadavia, que se atopa moi preto do domicilio familiar, vai mudar o seu enderezo de novo a Arnoia, localidade na que reside a súa familia.
Preguntada sobre que lle diría á xente que pensa que as persoas con discapacidade intelectual non poden ter unha vida autónoma, afirma con rotundidade que “podemos vivir sós, aínda que nos custe facer certas cousas”.
Dende Down Galicia queremos darlle os parabéns a Estefanía por conseguir esa praza fixa, pero, sobre todo, por servirnos de inspiración e de estímulo para acadar todo aquelo que nos propoñamos.
