O pasado mes de decembro, a Fundación Down Compostela participou no seminario online internacional que a Fundación Fasinarm de Ecuador organizou con motivo do Día Internacional das Persoas con Discapacidade. Neste ciclo de conferencias virtual, a entidade presentou o seu Programa de mellora de competencias dixitais na etapa de vida adulta, posto en marcha durante a pandemia e no que participaron de forma activa moitas das persoas con discapacidade que acoden á Fundación.
A coordinadora do programa de Inclusión Social e Laboral de Down Compostela, Aloia Lema, e a logopeda Rebeca Esmorís, que compartiron protagonismo con outras persoas expertas españolas, ecuatorianas, arxentinas e colombianas, expuxeron como xurdiu esta iniciativa, como se desenvolveu durante a pandemia e como continúa evolucionando na actualidade.
Na súa intervención, as dúas profesionais explicaron como durante a pandemia deseñáronse e puxéronse en marcha estratexias desde a Fundación para mellorar as competencias dixitais a través de diferentes ferramentas e iniciativas. Un novo enfoque que xerou un cambio de formulación, pasando da formación instrumental á abordaxe transversal das novas tecnoloxías, que permitiu poñer en marcha diferentes proxectos que, entre outros beneficios para as persoas con discapacidade intelectual, contribuíron a minimizar os riscos da fenda dixital durante a crise sanitaria xerada polo coronavirus, e que hoxe seguen espertando o interese das persoas que acoden a Down Compostela.
Ademais, o traballo realizado durante a pandemia para fomentar o uso das novas tecnoloxías tivo continuidade a través de dous proxectos. Un deles é a exposición Iguais.gal, que ten por obxectivo reivindicar a diversidade, o feminismo e as novas tecnoloxías como elementos crave na nosa sociedade e que percorreu xa varios centros socioculturais de Santiago. O segundo, que se puxo en marcha recentemente, trátase do Telexornal DC, un informativo no que as persoas con discapacidade contan as noticias que lles chamaron a atención da súa contorna máis próxima e que facilita a mellora da expresión oral e o uso das novas tecnoloxías.
Pero ademais de presentalo neste seminario internacional, o equipo de Inclusión Social e Laboral de Down Compostela xa dera a coñecer este proxecto con anterioridade. Aloia Lema Tilve asina un extenso traballo publicado o mes de marzo de 2021 no número 37 de Revísta Síndrome de Down Vida Adulta.