A Fundación Mapfre, a través da XII Convocatoria de axudas para proxectos sociais, colaborou con 10.000 euros no desenvolvemento do proxecto “Apoyo e intervención en el proceso de envejecimiento de personas con síndrome de Down y discapacidad intelectual” que Down Galicia realizou ao longo do 2022 nas súas sete entidades Down, situadas en Santiago, A Coruña, Ferrol, Lugo, Ourense, Pontevedra e Vigo.

A través deste soporte económico, 231 persoas con síndrome de Down e outras discapacidades intelectuais maiores de 20 anos -e priorizando aos maiores de 35- puideron gozar dunha serie de apoios para promover un proceso de avellentamento máis activo e saudable. Deste xeito, pódese dicir que a contribución da Fundación Mapfre terá como beneficiarias, de forma directa, a estas 231 persoas usuarias do proxecto e, de maneira indirecta, a 693 familiares que forman parte da rede de apoio de cada unha delas.

Para a consecución do obxectivo marcado neste proxecto leváronse a cabo distintas actividades, como a valoración do proceso de envellecemento das persoas usuarias, a elaboración dun plan individual de intervención, a avaliación e seguimento do envellecemento, a atención e o apoio psicosocial a familias e a coordinación con recursos socio-sanitarios da contorna comunitaria.

Envellecer é un proceso natural para todas as persoas, mais non deixa de ser unha conquista para as persoas coa síndrome de Down. De feito, nas últimas décadas apreciouse un espectacular aumento da súa esperanza de vida, superando en moitas ocasións os 60 anos. É por iso que empezamos a atoparnos nestes momentos cunha poboación maior de persoas adultas que mostran cambios prematuros relacionados coa idade e novas necesidades físicas, psíquicas, cognitivas e sociais ás que debemos dar resposta.

Para Down Galicia falar de envellecemento é falar de retos, pero tamén de futuro. A sociedade debe proporcionar ás persoas maiores con discapacidade as oportunidades que lles permitan ser o máis autónomas posible, gozar de boa saúde e ser produtivas, fomentando así o benestar e creando contornas ambientais máis propicias e favorables. É dicir, capacitar en lugar de xerar unha dependencia innecesaria.