A asociación Down Vigo e a empresa Carrefour veñen de reforzar a súa colaboración coa contratación dunha nova persoa usuaria da entidade, reforzando así o compromiso coa inclusión das persoas coa síndrome de Down e outras discapacidades intelectuais no mercado laboral ordinario. Trátase de Rubén, que, desde o pasado mes de outubro, forma parte do persoal de limpeza do hipermercado que a compañía ten no Centro Comercial Gran Vía da cidade olívica. As súas funcións, tal e como el explica, son “limpar as oficinas e a tenda”. O seu contrato súmase ao de outra persoa usuaria da asociación, que xa forma parte do persoal da tenda desde o ano 2014.
Rubén uniuse a Carrefour Vigo II en xuño e, tras uns meses demostrando a súa valía, a empresa recompensou o seu esforzo cun contrato dun ano de duración asinado no mes de outubro. Antonio Iglesias, Director de Recursos Humanos de Carrefour, destaca de Rubén “a súa rápida adaptación ao posto, o seu compromiso e a súa ilusión. Había unha frase que repetiu varios días: “Toño, cando empezo?”.
A reacción de Rubén ante a sinatura deste novo contrato é de alegría, pero tamén de orgullo ao ver a súa gran evolución no desenvolvemento do seu traballo e os resultados do seu esforzo: “Cada día véxome mellor e máis rápido”. Sobre isto, Antonio Iglesias indica que “a nivel persoal síntome feliz ao ver a evolución tan positiva de Rubén e o logro de superar as dificultades de comunicación, que hoxe parécenme xa moi afastadas”.
Sendo consciente de que aínda hai cousas que mellorar e que traballa todos os días por superarse, Rubén ten claro o seu obxectivo: “Gustaríame seguir aquí moito tempo e esfórzome porque quero conseguilo”.
A colaboración de Down Vigo e Carrefour Vigo II comezou o seu percorrido no ano 2007. Neste tempo, foron varias as persoas do Servizo de Emprego con Apoio da entidade as que melloraron a súa experiencia laboral na cadea de hipermercados, ben sexa a través de prácticas ou grazas a contratos en distintos postos de traballo, como persoal de caixa ou de reposición. Como afirma Antonio Iglesias, “a incorporación de Rubén ao noso equipo de traballo reafirma o compromiso que temos coa integración de persoas con diferentes capacidades”.
Desde Down Galicia agradecemos a Carrefour a súa implicación coa igualdade de oportunidades e damos os parabéns a Rubén por superar este reto.