A Federación Down Galicia vén de publicar a “Guía de recursos sobre a atención sanitaria de persoas coa Síndrome de Down”, un documento co que quere orientar ás e aos profesionais sanitarios na busca de resposta ás necesidades de atención sanitaria das persoas coa síndrome de Down cara un envellecemento saudable.
A guía recompila as principais publicacións existentes sobre a saúde das persoas coa síndrome de Down dividíndoas en dúas seccións: atención integral á saúde e áreas específicas de atención.
No primeiro grupo recóllense materiais divulgativos como o “Programa Español de Saúde para persoas coa síndrome de Down” de Down España ou outros documentos sobre a atención en urxencias, os coidados de enfermería ou as recomendacións de saúde para persoas adultas coa síndrome de Down, entre outros.
Na sección máis específica atopamos información sobre atención bucodental, otorrinolaringoloxía, xinecoloxía, oftalmoloxía, saúde mental e neuroloxía, xeriatría e xerontoloxía.
Grazas a esta ferramenta, as e os traballadores sanitarios tamén poderán dispoñer dunha táboa que recolle aos principais profesionais de referencia para consultar calquera dúbida ou cuestión sobre este recurso.
A “Guía de recursos sobre a atención sanitaria de persoas coa Síndrome de Down”, que reúne a mellor, máis completa e fiable información sobre a saúde do colectivo en todas as etapas da súa vida, foi elaborada polo Grupo de Traballo en Atención Médica que coordina a Federación e no que participan profesionais do ámbito sanitario, así como profesionais das distintas entidades Down en Galicia.
Podes consultala pinchando nesta ligazón.
