Desde a Federación Down España e o resto de entidades Down do país queremos dar un paso máis aló na loita pola inclusión social das persoas coa síndrome de Down este 21 de marzo. O obxectivo da nosa nova campaña é cambiar a forma de ver ás persoas coa síndrome de Down, unha forma de miralos que a miúdo está cargada de prexuízos e estereotipos que dificultan a súa inclusión na sociedade.

Xeneralizacións como as de que son todos cariñosos ou uns anxos ou algunhas máis despectivas referidas a que levan unha vida sen aspiracións nin metas, ou a que son persoas inactivas, que representan unha carga familiar, etc. contradinse coa realidade que viven as propias persoas coa síndrome de Down hoxe en día. Elas senten que teñen vidas plenas, cargadas de ilusións e proxectos. Por iso reivindican unha imaxe acorde coa autonomía da que xa gozan, que lles dá acceso a unha vida sen límites.

Para demostrar os estereotipos que aínda persisten na sociedade, desde Down España levaron a cabo un experimento social no que escolleron ao azar a 25 persoas de diferentes idades, nacionalidades, gustos e intereses, entre as que había unha persoa coa síndrome de Down. Todas realizaron un cuestionario sobre as procuras que habitualmente realizan na internet. Para rebuscar nos perfís de cada unha delas, contratamos á experta analista de datos e ciberinvestigadora, Selva Orejón, á que só mostramos as procuras realizadas por Oriol Cano, un home de 47 anos coa síndrome de Down. Querían comprobar se ela lograba identificar quen era a persoa detrás de preguntas como Como adelgazar sen deixar para comer?, Como levar unha relación a distancia? ou Que pasa se quedo só? Cuestións que fixeron dubidar á experta acerca de quen estaba detrás delas.

Lograría a analista recoñecer á persoa coa síndrome de Down entre todos os perfís? Ese é o desafío ao que se enfrontan hoxe en día miles de cidadáns e cidadás ao coñecer e tratar ás persoas coa síndrome de Down, limitadas por multitude de prexuízos e estereotipos.

O signo + como símbolo de apoio á campaña en redes sociais

Desde as entidades Down de España poñeremos en marcha o próximo 21 de marzo unha potente campaña en redes sociais convidando á sociedade a unirse ao noso colectivo co hashtag #NoSomosUnEstereotipo, que aspira a converterse en Trending Topic en Twitter.

Para iso, pedimos que todas as persoas que queiran mostrar o seu apoio ao noso colectivo se fagan unha foto facendo o signo + coas mans, co que queremos simbolizar que as persoas coa síndrome de Down son moito máis que un estereotipo e que teñen moito que achegar á sociedade.