O Teatro Principal de Ourense foi o escenario escollido pola Federación Down Galicia e pola Asociación Down Ourense para conmemorar un novo Día Mundial da Síndrome de Down. Nun acto que mesturou unha parte institucional con distintas experiencias de vida, as persoas coa síndrome de Down foron as verdadeiras protagonistas, poñendo de manifesto que están cansas de que as etiqueten e de todos os prexuízos que existen sobre elas, e reclamando, un ano máis, os seus dereitos.
“As persoas coa síndrome de Down somos persoas dignas de todo dereito. Temos dereito a participar na vida comunitaria e a ser persoas autónomas e independentes. Temos dereito a estudar, a traballar, a querer, a divertirnos e a relacionarnos. Temos dereito a explorar, a experimentar e a decidir. E merecemos as mesmas oportunidades que os demais para facer o que desexamos e para equivocarnos”, demandaron.
A persoa encargada de conducir este acto conmemorativo foi o coñecido locutor de radio Pepe González, que estivo acompañado en todo momento por Rubén Yáñez, un mozo usuario de Down Ourense. Cristina Abadín e Verónica Pardellas, pola súa banda, foron as encargadas de dar lectura ao Manifesto pola Promoción da Autonomía Persoal, dando así voz a todo o colectivo e facendo fincapé en que as persoas coa síndrome de Down, coma calquera outra, queren vivir a vida que elas mesmas elixan.
No acto tamén interviñeron o alcalde de Ourense, Gonzalo Pérez Jácome; o conselleiro de Sanidade, Julio García Comesaña; a deputada de Igualdade, Benestar, Servizos Sociais e Emprego da Deputación de Ourense, Luz Doporto Real; a presidenta de Down Ourense, Sonia González Sánchez; e o presidente de Down Galicia, Delmiro Prieto González.
A benvida correu a cargo da presidenta de Down Ourense, que aproveitou a súa quenda de palabra para agradecer a asistencia de tódalas persoas asistentes. Sonia González deu a benvida ao evento destacando o percorrido da entidade durante os seus 20 anos de existencia e sinalando que, aínda que neste tempo “as persoas coa síndrome de Down gañaron cotas de visibilidade, de autonomía e de exercicio efectivo de dereitos, queda moito por facer”. Ademais, González insistiu en que desde as entidades Down de Galicia seguirán “defendendo con convencemento que as persoas coa síndrome de Down teñen voz propia, e que o que realmente necesitan, son oportunidades para facerse oír”.
O presidente de Down Galicia, pola súa parte, quixo comezar a súa intervención felicitando a Down Ourense polo seu 20 aniversario e poñendo en valor “o gran traballo e o camiño percorrido nestas dúas décadas”. Continuou o seu discurso recordando a importancia que teñen os cambios lexislativos, dos que di que “son moi lentos, pero tremendamente necesarios”. Prieto deixou claro que “o léxico xoga un papel fundamental no cambio das realidades e as mentalidades” e que é vital “na loita contra os estereotipos existentes”. O presidente de Down Galicia aproveitou tamén a presenza institucional dos representantes autonómicos, provinciais e municipais para instar ás administracións a “poñer o seu gran de area na posta en funcionamento do novo local de Down Ourense”, que está inmersa nun cambio de sede por quedarse a actual moi pequena para o número de persoas usuarias que precisan dos servizos ofrecidos. Por último, Prieto destacou que “estes actos serven de recoñecemento a todas as entidades que están presentes nas 7 cidades principais de Galicia, xa que sen a unión de todos non tería sido posible avanzar en materia de inclusión”.
Ademais das intervencións das autoridades presentes, as persoas asistentes a este acto puideron desfrutar de varios relatorios protagonizados por profesorado, empresarios locais, familias e persoas coa síndrome de Down e outras discapacidades intelectuais, que puxeron de manifesto a importancia da inclusión socio-laboral a través de diferentes experiencias de vida en ámbitos como a educación, o emprego ou a vida independente.
O acto rematou coa actuación da Real Banda de Gaitas da Deputación de Ourense, que deleitou a todo o público coa interpretación de dúas pezas acompañadas dun estupendo espectáculo.
Premios Down Galicia
Down Galicia entregou nesta ocasión os VIII Premios Down Galicia, que teñen por obxecto recoñecer o labor a prol da promoción da autonomía e igualdade das persoas coa síndrome de Down, realizado tanto por institucións e entidades como por persoas particulares.
O premio na categoría institucional foille concedido a Rodríguez López Auto pola súa sensibilidade e larga traxectoria de apoio incondicional á inclusión laboral das persoas coa síndrome de Down e outras discapacidades intelectuais, tendo a dúas persoas contratadas no seu equipo de traballo desde hai máis de 10 anos. Mentres, na categoría de persoa particular, o galardón foille concedido a Ana Belén Fernández, psicomotricista do Complexo Hospitalario de Ourense, pola súa desinteresada colaboración para impulsar no ano 2003 a creación de Down Ourense e polo acompañamento que brinda ás novas familias desde a súa unidade de atención temperá.
Ademais, con motivo do 25 aniversario da Federación Down Galicia, outorgouse un Premio Extraordinario á firma internacional de servizos legais Garrigues, pola súa desinteresada colaboración coas entidades Down, achegando sempre unha resposta satisfactoria ás súas consultas e facéndoo dun xeito eficiente e eficaz.
O premio consiste nun recoñecemento simbólico e na entrega dunha figura representativa da imaxe Down realizada polo artesán galego Fernando Porto.
Iluminación dos principais monumentos de Galicia
Un ano máis, os principais monumentos das sete grandes cidades de Galicia tinguiranse de azul e amarelo para conmemorar o Día Mundial da Síndrome de Down. Así, a Cidade da Cultura en Santiago de Compostela, a Fonte de Catro Camiños na Coruña e as da Rúa Aragón en Vigo, a pasarela peatonal “Tanxurela” en Lugo, os concellos de Lugo e Pontevedra, a Ponte Romana de Ourense, o Teatro Jofre en Ferrol, o edificio da Deputación de Lugo, ou o edificio da Xunta de Galicia en San Caetano, entre outros, iluminaranse os vindeiros días 20 e 21 de marzo para dar visibilidade e concienciar á sociedade neste día tan destacado.
Nacións Unidas aprobou en novembro de 2011 a declaración do 21 de marzo como Día Mundial da Síndrome de Down. Establécese esta data, o 21 de marzo [21/03] como un símbolo, en referencia á triplicación [trisomía] do cromosoma 21 que se traduce na condición xenética da síndrome de Down.
Campaña estatal #NoSomosUnEstereotipo
Con motivo do Día Mundial da Síndrome de Down, as entidades Down de España lanzaron o pasado día 10 de marzo a campaña “#NoSomosUnEstereotipo, somos mucho más”, co obxectivo de que a sociedade cambie a forma que ten de ver ás persoas coa síndrome de Down, que a miúdo está cargada de prexuízos e estereotipos que dificultan a súa inclusión.
Xeneralizacións como que son persoas cariñosas ou uns anxos, ou algunhas máis despectivas referidas a que levan unha vida sen aspiracións nin metas, ou que son persoas inactivas, que representan unha carga familiar, etc. contradinse coa realidade que viven as propias persoas coa síndrome de Down hoxe en día. Elas senten que teñen vidas plenas, cargadas de ilusións e proxectos e por iso reivindican unha imaxe acorde coa autonomía da que xa gozan, que lles dá acceso a unha vida sen límites.
O signo + como símbolo de apoio á campaña en redes sociais
As entidades Down de España levan a cabo este 21 de marzo unha potente campaña en redes sociais co hashtag #NoSomosUnEstereotipo, e convidan á sociedade a unirse a esta iniciativa, que aspira a converterse en Trending Topic en Twitter.
Para iso, piden que todas as persoas que queiran mostrar o seu apoio ao colectivo se fagan unha foto facendo o signo + coas mans, co que queren simbolizar que as persoas coa síndrome de Down son moito máis que un estereotipo e que teñen moito que achegar á sociedade.
