A asociación Down Vigo organizou durante as últimas semanas varios actos para conmemorar o Día Mundial da Síndrome de Down, que se celebrou onte, 21 de marzo, en todo o mundo. Así, a entidade planificou actos en varios puntos da cidade, coa intención de dar visibilidade á inclusión real e romper os estereotipos que, aínda a día de hoxe, permanecen na sociedade.

O venres 17 de marzo celebrouse o I Desfile Inclusivo, en colaboración con Decathlon, no escenario Vigo Exporta do centro comercial Vialia. Trátase dunha iniciativa solidaria que buscaba sensibilizar acerca dos valores do deporte: cooperación, esforzo e traballo en equipo. Persoas coa síndrome de Down e outras discapacidades intelectuais compartiron pasarela con traballadores e traballadoras de Decathlon, para entre todos mostrar que calquera deporte pode ser unha ferramenta de desenvolvemento individual e colectivo.

Fútbol, baloncesto, tenis, sendeirismo, natación, escalada… Todas as modalidades deportivas estiveron representadas na pasarela, que puideron desfrutar todas as persoas que abarrotaron o espazo Vigo Exporta, escenario da iniciativa. Sara, que forma parte da entidade, e Diego, traballador de Decathlon, foron os presentadores dos seus propios compañeiros e compañeiras, e amenizaron o acto xunto ao saxofonista Diego Caride, que durante máis dunha hora ofreceu un concerto de música en directo. Como explicou Sara, “estamos aquí para demostrar que achegamos valor á sociedade e que todos sumamos”.

O proxecto completouse co taller infantil ‘Pinta o teu calcetín’, impartido por Ludiland, no que seis nenos e nenas que asisten á entidade compartiron espazo co resto de cativada do centro comercial para decorar os seus propios calcetíns desemparellados.

Xa o propio Día Mundial da Síndrome de Down inaugurouse na planta baixa do centro comercial Gran Vía a exposición ‘Donde puede ser’, un proxecto colaborativo no que as persoas coa síndrome de Down e outras discapacidades intelectuais dan visibilidade ás diferentes realidades. Así, coa iniciativa dos calcetíns desemparellados explícase de forma moi visual que ningunha persoa é igual a outra e iso é, precisamente, o que nos enriquece como sociedade. A exposición poderase visitar ata o próximo 2 de abril.