Con motivo do Día Mundial da síndrome de Down, que se celebrou onte en todo o mundo, a asociación Down Lugo colocou esta mañá na Praza Maior da cidade unha mesa informativa e unha exposición fotográfica sobre emprego inclusivo para dar visibilidade ao traballo da entidade e sensibilizar acerca das capacidades das persoas coa síndrome de Down.
Xa pola tarde, a asociación organizou unha andaina reivindicativa, na que participaron persoas usuarias da asociación, familiares, voluntarios e voluntarias da Asociación Sénior de Telefónica de Lugo (Astelu) e representantes de distintas institucións. Esta camiñada, que percorreu as rúas do centro da cidade, rematou na Praza Maior coa lectura do Manifesto pola Promoción da Autonomía Persoal.
Deste xeito, os mozos e mozas da asociación encargáronse de desbotar mitos e prexuízos sobre a síndrome de Down, e reivindicaron unha vez máis os seus dereitos como cidadáns e cidadás de pleno dereito, incidindo na importancia da inclusión e da eliminación das barreiras existentes na contorna.
Estas accións están incluídas dentro dos actos que a Asociación Down Lugo e o movemento Down Galicia llevaron a cabo para conmemorar esta sinalada data.
