Con motivo do Día Mundial da síndrome de Down, que se conmemorou onte en todo o mundo, membros de Teima Down Ferrol deron lectura na Praza de Galicia ao Manifesto pola Promoción da Autonomía Persoal, unha proclama reivindicativa coa que buscan reclamar os seus dereitos.

Tralo alumeado en cor azul e amarelo do Teatro Jofre con motivo desta efeméride, Juanjo, Iago, Ceci e Dani alzaron a súa voz para recordar o moito que aínda queda por facer en materia de inclusión social e para reclamar a fin dos estereotipos e dos prexuízos vencellados ás persoas coa síndrome de Down.

Xeneralizacións como que son todos cariñosos, ou algunhas máis despectivas referidas a que levan unha vida sen aspiracións nin metas ou que representan unha carga familiar, contradinse coa realidade que viven as propias persoas coa síndrome de Down hoxe en día. Elas teñen vidas plenas, cargadas de ilusións e proxectos, e por iso reivindican unha imaxe acorde coa autonomía da que xa gozan e que lles dá acceso a unha vida sen límites.

Xunto cos teimudos e teimudas estiveron diferentes representantes de colectivos políticos, culturais, veciñais e sindicais da cidade.

Ademais do Teatro Jofre e grazas á colaboración do concello, os días 20 e 21 de marzo ilumináronse tamén a fonte del Cantón de Molíns, a rúa Magdalena e os tramos da rúa Terra, a rúa Real e a rúa Rubalcava, que rodean a Praza de Armas.

Colaboración co Centro Comercial Odeón

Nesta ocasión, o Centro Comercial Odeón de Narón quixo colaborar con Teima na difusión deste Día Mundial da Síndrome de Down.

Deste xeito, o establecemento está a reproducir durante estes días nas súas pantallas a serie de vídeos curtos “Si me miras, me ves” elaborados pola entidade, cos que buscan concienciar á veciñanza de Narón e Ferrol da importancia da participación social de tódalas persoas e da necesidade de aproveitar unha data sinalada como o Día Mundial da Síndrome de Down para facer ver todo o que queda por avanzar na loita pola inclusión real.