Este mes de maio finaliza con moi boas novas no Movemento Down de Galicia, xa que a empresa Cafés Candelas acaba de contratar de xeito indefinido a una persoa usuaria da asociación Down Lugo.

Así, desde o pasado día 15, o departamento de loxística da empresa lucense conta cun novo mozo de almacén, que se está a encargar de distintas tarefas como a preparación de pedidos, a carga e descarga das mercancías ou o mantemento da orde nas instalacións.

Este contrato non foi froito da casualidade, xa que se asinou tras dous meses de prácticas baixo a metodoloxía de Emprego con Apoio, nos que un preparador laboral de  Down Lugo acompañou á persoa usuaria para perfeccionar o desempeño das súas tarefas e funcións e onde o novo traballador demostrou ser brillante na execución das mesmas. Ademais, contouse coa colaboración e a acollida dos compañeiros e compañeiras de almacén, que puxeron todo da súa parte para que a incorporación chegase a bo porto.

Pero o traballo e o esforzo veñen de máis atrás aínda, xa que a formación e a experiencia foron claves para que este mozo conseguise o tan ansiado contrato indefinido. Nove anos con contratos temporais nunha cadea de supermercados e formación no manexo de carretillas elevadoras e traspaletas, así como un desempeño perfecto das súas tarefas, foron claves para a consecución da meta.

Tralo período de prácticas, a directora de recursos humanos e o xefe de loxística da empresa preguntáronlle ao mozo pola súa experiencia e este díxolles que se sentira moi realizado, que era o seu tipo de traballo e que o equipo profesional era estupendo. Desde Cafés Candelas amosaron o seu interese en contratalo e tras unha semana valorando a posibilidade, a oportunidade chegou.

Desde a Federación Down Galicia queremos agradecer a Cafés Candelas a súa confianza no noso programa de Emprego con Apoio e a súa aposta decidida pola inclusión laboral, e tamén destacar a colaboración e o trato excepcional das persoas de recursos humanos e do departamento de loxística da empresa.