A próxima ponte do 12 de outubro, A Coruña acollerá a máis de 450 persoas na cita anual máis importante para o colectivo de persoas coa síndrome de Down e as súas familias, e desde este luns (ata esgotar as prazas dispoñibles) é posible realizar a inscrición. Como en edicións anteriores, este XXIII Encontro de Familias estará repleto de actividades, talleres e conferencias do máis interesantes.

Para inscribirse a este evento organizado por Down España e a asociación anfitrioa Down Coruña, é necesario acceder a esta ligazón e cubrir os datos solicitados: eventos.sindromedown.net

Como todos os anos, no Encontro haberá distintas opcións culturais simultáneas para que cada persoa poida escoller a que máis lle encaixe en función dos seus gustos e intereses. No proceso de inscrición é posible seleccionar ditas actividades. O primeiro día débese seleccionar unha única opción das 3 dispoñibles (dúas para familias e unha para mozos e mozas) e para o segundo día, hai unha opción para familias a primeira hora (visita ao concello) con aforo limitado e logo catro opcións á mesma hora entre as que hai que elixir unha.

Neste vídeo explicativo atópanse as instrucións para realizar a inscrición correctamente:

Como cada ano, a organización espera con moita ilusión atoparvos neste encontro que supón unha oportunidade única de formación, apoio, entretemento e de visibilización das persoas coa síndrome de Down.

Nesta ocasión, a cidade da Coruña abrirá as súas portas a este Encontro no que a historia, a cultura e a gastronomía terán un papel moi importante. O Palacio de Exposicións e Congresos da Coruña (Palexco), a beiras do mar e moi próximo ao centro histórico da cidade, será o epicentro deste multitudinario evento, que conta cun programa repleto de actividades e charlas.

Programa completo dispoñible aquí: https://www.downcoruna.org/enf/