O pasado 17 de xuño, a empresa do sector da automoción CIE Galfor celebrou o seu 50 aniversario nun evento no que nove persoas usuarias da asociación Down Ourense participaron como azafatos e azafatas.

A empresa Organiza Nigrán decidiu contratar a estes mozos e mozas para que se encargasen de diversas tarefas de organización como o acceso ao evento a través da lectura dos códigos QR das entradas, a entrega de regalos á cativada asistente, o subministro de EPIs no stand dedicado a este tema ou a entrega de distintos recordos ás persoas traballadoras e ex-traballadoras de Galfor.

Tras unha xornada intensa e chea de novas experiencias, desde Down Ourense afirman que esta oportunidade resultou sumamente enriquecedora para todas as partes involucradas. Amosar o éxito da inclusión laboral nun evento tan significativo como o 50 aniversario dunha empresa como Galfor pon de manifesto a importancia de proporcionar oportunidades, por pequenas que estas sexan.