Despois de moitos meses agardando este momento, por fin chegou o verán e varios mozos e mozas de Down Lugo decidiron organizar un ano máis as saídas vacacionais das que tanto desfrutan. Este ano, divididos en dous grupos, visitaron a zona da comarca do Barbanza, concretamente a localidade da Pobra do Caramiñal.

O primeiro dos grupos viaxou do 30 de xuño ao 2 de xullo e o segundo a semana seguinte, do 5 ao 7 de xullo.

Na primeira xornada, os viaxeiros e viaxeiras instaláronse no Camping Ría de Arosa I e aproveitaron para visitar Boiro e desfrutar das Festas do Verán, onde puideron pasear polo mercadillo, escoitar música en directo nas rúas da localidade e gozar co ambiente festivo.

Ademais, como contaron con bo tempo durante ambas viaxes, os mozos e mozas achegáronse ata a fermosa praia de Cabío e, aínda que coinciden en que a auga da zona está moi fría, non deixaron pasar a oportunidade de darse un bo baño nas tranquilas augas do areal.

Para completar a viaxe, non faltaron os paseos polas zonas próximas á praia e pola Pobra do Caramiñal, desfrutando das paisaxes e das vistas que ofrece a Ría de Arousa.

E despois duns días inesquecibles, xa só queda organizar a seguinte saída!

Estas actividades, enmarcadas no programa Iniciativa Xove, están subvencionadas pola Consellería de Política Social e Xuventude, a través da Dirección Xeral de Xuventude, Participación e Voluntariado da Xunta de Galicia.