O pasado venres, persoas vencelladas ás entidades Down de toda Galicia participaron na xuntanza autonómica online de irmáns e irmás de persoas coa síndrome de Down e outras discapacidades intelectuais.

Este encontro, primeira toma de contacto entre elas, serviu de escenario para a posta en común de diferentes cuestións de interese, como propostas de mellora para as entidades Down, suxestións para aumentar a participación no día a día das mesmas, o intercambio das distintas experiencias vividas ata o momento e a exposición das preocupacións actuais, entre outras.

No remate da xuntanza, os e as participantes coincidiron na necesidade de contar con máis espazos coma este, onde intercambiar ideas, consellos e información, e manifestaron o seu interese en repetir o vindeiro ano.

A importancia dos irmáns e irmás

Os irmáns e as irmás das persoas coa síndrome de Down e outras discapacidades intelectuais son un piar fundamental das súas vidas. Algo que tamén sucede á inversa. Teñen unha posición privilexiada á hora de detectar algunhas das necesidades e reclamos que ten a persoa con discapacidade, e son tamén os principais valedores dos seus irmáns e irmás e quen máis lles impulsan cara a unha vida autónoma e independente.

Deste xeito, é importante contar con grupos de apoio de irmáns e irmás de persoas coa síndrome de Down e outras discapacidades intelectuais, xa que haberá determinados temas ou situacións que outro irmán ou irmá entenderá mellor e ofrecerá outra visión ou punto de vista.

Así, nestes encontros búscase crear vínculos entre irmáns e irmás de persoas con discapacidade intelectual e capacitalos para que se convertan nun referente para a persoa con discapacidade e impulsen a súa autonomía e independencia persoal, nun espazo no que facer oír e valer a súa opinión.