O pasado xoves, Down Ourense e Fundación Vodafone España presentaron en La Molinera (Ourense) “H@ppy Day”, unha iniciativa cuxo obxectivo é concienciar aos empresarios e á sociedade sobre os beneficios da inserción laboral das persoas coa síndrome de Down.
Nesta acción, que forma parte do programa de formación prelaboral en Novas Tecnoloxías “Yo me prep@ro”, participaron representantes do tecido empresarial de Ourense, así como usuarios de Down Ourense que conseguiron un posto de traballo grazas a el.
Xuntos contaron as súas experiencias, poñendo de manifesto os beneficios que achegan as persoas coa síndrome de Down no traballo e o positivo que é para os empresarios contar con eles nos seus persoais. Eles, empregados e empregadores, alentaron a outros empresarios para contratar a persoas con discapacidade intelectual e a que comproben as vantaxes sociais e produtivas que se obteñen ao darlles unha oportunidade nunha empresa normalizada: melloran o clima laboral, achegan alegría e optimismo, e son metódicos e organizados nas súas tarefas.
No acto interviñeron o alcalde de Ourense, Jesús Vázquez; o vicepresidente da Deputación de Ourense e Concelleiro de Servizos Xerais, Promoción Económica e Emprego, Jorge Pumar; a vicepresidenta de Down Ourense, Mila Requejo; e o responsable de Administracións Públicas de Vodafone España en Galicia, Jesús Sueiro. Tamén se contou coa presenza de representantes do sector empresarial, como Natalia Barreiros, responsable de Merkal Calzado; Carlos Mata, responsable da empresa Primux, e Verónica Pardellas, usuaria de Down Ourense.
Na súa intervención, o alcalde de Ourense, Jesús Vázquez, agradeceu que se desenvolvan “iniciativas como estas, nas cales se mesturan o social, as novas tecnoloxías e o laboral”. Destacou a relación do Concello con Down Ourense, entidade que “teño o pracer de coñecer e visitar cada vez que podo, e sei de primeira man a gran satisfacción que teñen as empresas á hora de contar con traballadores coa síndrome de Down nos seus persoais”.
O vicepresidente da Deputación de Ourense e Concelleiro de Servizos Xerais, Promoción Económica e Emprego, Jorge Pumar, mencionou que o colectivo “sempre contará coa súa institución para acoller iniciativas tan positivas como esta”.
Pola súa banda, a vicepresidenta de Down Ourense, Mila Requejo, agradeceu que programas como “Yo me prep@ro” axuden ás persoas coa síndrome de Down a formarse en novas tecnoloxías, indispensables para atopar traballo. Requejo explicou que “dos 8 mozos de Down Ourense que participaron neste curso, 4 conseguiron un contrato de traballo e 6 realizaron prácticas en distintas empresas da cidade”.
O responsable de Administracións Públicas de Vodafone España en Galicia, Jesús Sueiro, felicitou a Down Ourense polos resultados obtidos, e enxalzou o carácter nacional do programa, que celebra a súa terceira edición.
O responsable da empresa Primux, Carlos Mata, compartiu a súa experiencia contando cun traballador coa síndrome de Down: “Estamos totalmente satisfeitos con el; leva xa algo máis dun ano, e queremos que siga no noso persoal. Convidaría a calquera a verlles traballar no día a día, e a aprender coa experiencia”.
Por último, Verónica Pardellas, usuaria de Down Ourense e participante no programa, contou a súa experiencia de traballo na empresa Merkal Calzados, e aproveitou a oportunidade para convidar os empresarios a dar oportunidades ás persoas coa síndrome de Down.
O programa “Yo me prep@ro”
O obxectivo do proxecto ‘Yo me prep@ro’ é proporcionar ás persoas con discapacidade intelectual as ferramentas e estratexias necesarias en aspectos crave como o uso adecuado das TIC: programas informáticos, navegación por Internet, acceso a redes bancarias informatizadas ou aplicacións móbiles. Todo co obxectivo de axudarlles a salvar a fenda dixital que lles condiciona enormemente á hora de atopar un posto de traballo, o que supón unha seria traba ás súas aspiracións de mellorar a súa autonomía e levar unha vida o máis plena e independente posible.
Este ano, na nosa provincia están a recibir esta formación prelaboral en Novas Tecnoloxías 8 usuarios de Down Ourense, que adquiren as competencias necesarias para poder desempeñar un posto de traballo coa normalidade e eficacia de calquera empregado.
Estes alumnos de Ourense sumaranse a outros en diversas provincias, alcanzando un total de 240 mozos que recibirán esta formación en toda España. É total serán 10.500 horas formativas apoiadas en sete novos vídeo-tutoriales que, cunha linguaxe sinxela e accesible, detallarán os pasos e instrucións para que os alumnos coñezan a fondo o uso da internet, xestionar o correo electrónico ou manexar redes sociais como LinkedIn, entre outras habilidades.
Tras o éxito de anteriores edicións, o proxecto afronta este ano a súa terceira edición a nivel nacional con renovado impulso, pois superou as expectativas tanto no número de prácticas conseguidas como na cifra de contratacións alcanzadas. Desde a súa posta en marcha en 2014, e a pesar das complicadas condicións do mercado de traballo, este programa conseguiu 222 contratos para alumnos coa síndrome de Down.
Como complemento a esta edición, os 480 mozos que participaron nas dúas edicións anteriores do proxecto recibirán un curso de refresco dos seus coñecementos para que actualicen as destrezas adquiridas en novas tecnoloxías aplicadas á vida laboral.
Convenio marco
A realización deste proxecto enmárcase dentro do Convenio Marco subscrito o 8 de novembro de 2013 entre Fundación Vodafone España, Plena Inclusión e Down España para a realización de actividades conxuntas en materia de accesibilidade e inserción laboral que redunden en mellorar as condicións de vida das persoas con discapacidade intelectual.
Este convenio busca fomentar a innovación tecnolóxica aplicada á accesibilidade e fai especial fincapé naquelas iniciativas que contribúan á participación das persoas con discapacidade intelectual no ámbito laboral a través de proxectos piloto de innovación e sesións formativas e de divulgación.