Coa chegada da nova normalidade a Galicia, as entidades Down están a retomar pouco a pouco a atención presencial, programando sesións de traballo de forma individual e con cita previa. Estes encontros levaranse a cabo de xeito seguro e adoptando todas as medidas de seguridade estipuladas polos organismos competentes.
Desde o movemento Down queremos resaltar que será de vital importancia que, ante o mínimo síntoma de coronavirus (tose seca, febre, fatiga ou dificultade para respirar), as persoas usuarias e as súas familias non se acheguen ata as súas entidades de referencia aínda que teñan unha cita programada. A prevención é a mellor ferramenta na loita contra o virus.
Nun primeiro momento, retomaranse as sesións presenciais de traballo con aquelas persoas pertencentes aos grupos máis vulnerables, como é o caso de aquelas que se atopan en situación de fenda dixital ou aquelas que están notando de xeito máis notorio un retroceso cognitivo.
As sesións en grupo e o resto das actividades levadas a cabo polas entidades terán que esperar a que a Xunta de Galicia autorice a súa realización. Mentres non existan novas indicacións ao respecto, os e as profesionais do movemento Down seguirán prestando servizos a distancia por medios telemáticos como levan facendo desde o inicio do estado de alarma.
A Federación Down Galicia e as súas entidades continuarán a disposición das persoas coa síndrome de Down e outras discapacidades intelectuais, e das súas familias, nos seguintes números de teléfono e enderezos de correo electrónico:
| Federación Down Galicia 981 58 11 67 downgalicia@downgalicia.org |
Down Vigo 986 20 16 56 downvigo@downvigo.org |
| Down Pontevedra “Xuntos” 986 86 55 38 xuntos@downgalicia.org |
Teima Down Ferrol 981 32 22 30 teimadownferrol@teimadownferrol.org |
| Down Lugo 982 24 09 21 downlugo@downlugo.org |
Fundación Down Compostela 981 56 34 34 downcompostela@downcompostela.org |
| Down Coruña 981 26 33 88 asociacion@downcoruna.org |
Down Ourense 988 37 03 13 downourense@downgalicia.org |