A Federación Down Galicia é unha entidade sen ánimo de lucro creada no ano 1998 que agrupa a sete entidades específicas para a síndrome de Down de Galicia.
O sentido principal da súa existencia vén dado pola necesidade de establecer as medidas precisas para garantir a igualdade de oportunidades das persoas coa síndrome de Down e outras discapacidades intelectuais, a través da provisión de servizos e actividades das que están desprovistas na súa contorna.
O obxectivo prioritario de Down Galicia é conseguir que as persoas coa síndrome de Down e calquera outra discapacidade intelectual consigan a máxima capacidade posible para levar unha vida autónoma, tomar as súas propias decisións e formar parte da sociedade dunha maneira visible e inclusiva.
Apoiar o labor das entidades da Federación no traballo pola inclusión das persoas coa síndrome de Down ou outras discapacidades intelectuais, a través de apoios personalizados ao longo da súa vida e da súa participación nos recursos existentes para toda a poboación.
Os principios son un conxunto de parámetros éticos de carácter universal, que poden expresar normas xurídicas, dirixidos a orientar a vida e labor da entidade
Defendemos a riqueza dunha sociedade diversa. Cada persoa é única, diferente e irrepetible. As diferenzas de cada persoa deben ser aceptadas, valoradas e tidas en conta, dándolles a mesma importancia que ás do resto da sociedade. O respecto pola diversidade permite descubrir e valorar a cada quen como un ser único que achega valor á comunidade, evitando a exclusión social
Defendemos o valor e a dignidade das persoas polo feito de ser persoas, independentemente das súas capacidades e logros. As persoas coa síndrome de Down ou calquera outra discapacidade intelectual teñen os mesmos dereitos e deberes que as demais persoas. Toda persoa, pola súa condición de ser humano, merece ser respectada, valorada e non discriminada por ningún motivo. A dignidade é un dereito fundamental e o valor dunha persoa non depende dos méritos acadados
Promovemos a autonomía individual e a autoxestión para levar unha vida independente, xa que todas as persoas teñen dereito á autodeterminación e a ser protagonistas da súa propia vida. Por tanto, todas as persoas adultas teñen dereito a tomar de forma autónoma as súas propias decisións e a vivir de xeito independente, en igualdade de condicións que as demais e coa mínima interferencia na súa vida privada. A autonomía decisoria das persoas é un dereito fundamental, polo que se impulsará a súa capacidade para afrontar esa toma de decisións, facilitándolles as ferramentas e os apoios personalizados necesarios para desenvolver a súa vida e acadar a máxima independencia.
Demandamos o cumprimento do dereito á accesibilidade universal, sendo fundamental traballar por eliminar as barreiras e as situacións de desigualdade dende todas as administracións e a propia sociedade. Facer accesible os espazos, as comunicacións ou os servizos é un dereito de todos e todas e é a clave para contribuír á construción dunha sociedade máis diversa, xusta e inclusiva. Ademais da accesibilidade da contorna física é fundamental asegurar a accesibilidade cognitiva, aplicando a accesibilidade universal no ámbito das tecnoloxías da información e a comunicación, así como nas relacións coas administracións, sendo necesaria a eliminación de barreiras de acceso ao coñecemento e a comprensión
Defendemos a non discriminación, e damos o apoio necesario a cada persoa, para promover o desenvolvemento en todas as etapas da súa vida. Recoñecer e valorar as diferenzas implica levar a cabo medidas que fagan real e efectivo o exercicio dos dereitos e liberdades de todas as persoas. É preciso identificar e eliminar as situacións de desigualdade que impiden ou dificultan que todas as persoas poidan exercer os seus dereitos e realizar o seu proxecto de vida, articulando os apoios necesarios.
Promovemos e apoiamos a presenza e o avance de cada persoa en todos os ámbitos da sociedade, dándolle visibilidade ao longo da súa vida. Apostamos pola participación activa das persoas na súa contorna, tanto na comunidade como na vida asociativa das entidades e da federación, onde deben ter voz nas decisións políticas e nos servizos, fundamentalmente naqueles que lles afecten de xeito directo. Todas as persoas que forman parte dunha sociedade contribúen a enriquecela. A inclusión é unha tarefa de todos e todas, polo que é necesario crear contornas accesibles nas que aseguremos a participación e avance de toda a poboación. A exclusión social de calquera persoa non ten cabida nunha sociedade moderna e diversa. Cando se deixa á marxe a aquelas que teñen síndrome de Down ou calquera outra discapacidade intelectual, ademais de vulnerar os seus dereitos, empobrécese a sociedade
Os valores son as guías para definir o correcto comportamento da entidade na sociedade. Conxunto de cualidades que permiten á entidade actuar de acordo ao que se considera correcto.
A Federación Down Galicia desenvolve o seu labor en sintonía cos seguintes valores:
Defendemos os dereitos, deberes e liberdades das persoas coa síndrome de Down ou calquera outra discapacidade intelectual a través dos nosos principios e valores, desenvolvendo políticas efectivas acordes coa “Convención Internacional de Naciones Unidas sobre los Derechos de las Personas con Discapacidad”
As entidades Down están conformadas por familias, unidas pola mellora na calidade de vida das persoas coa síndrome de Down ou outras discapacidades intelectuais. Coa súa forza, impulsan á Federación a levar a cabo a súa misión, que respecta o ámbito de decisión de cada unha das entidades da Federación e procura o consenso nos aspectos que sexan de interese común.
Fomentamos a utilización das instalacións, recursos e servizos destinados á poboación en xeral existentes na sociedade, tanto públicos como privados. Consideramos que estes recursos deben ser empregados por todas as persoas, en igualdade de condicións, evitando o illamento e a exclusión, así como a segregación en espazos específicos só para persoas con discapacidade
Traballamos de xeito independente e comprometido para conseguir a mellora continua. Buscamos a satisfacción de todos os nosos grupos de interese e aseguramos a transparencia, a efectividade e a coherencia nas nosas actuacións, así como a mellora da competencia profesional e o talento dos equipos a través da formación e o coñecemento compartido. Así mesmo, coordinámonos cos recursos existentes na comunidade e sensibilizamos á sociedade sobre os dereitos das persoas con discapacidade e a importancia da provisión de apoios para estas e as súas familias.
Delmiro Prieto González
(Down Compostela)
Delmiro Prieto González
(Robles de Laciana – León, 1956)
Manuel Pérez Cabo
(Down Pontevedra “Xuntos”)
Manuel Pérez Cabo
(Monforte de Lemos – Lugo, 1952)
Elías Ledo Fernández
(Down Compostela)
Elías Ledo Fernández
(Chantada – Lugo, 1955)
Rafael Cabezas Enríquez
(Down Ourense)
Rafael Cabezas Enríquez
(Ourense, 1952)
José Antonio Villamarín Cid
(Down Lugo)
José Antonio Villamarín Cid
(A Porqueira – Ourense, 1961)
José Martín Rodríguez
(“Teima” Down Ferrol)
José Manuel Martín Rodríguez
(Ferrol – A Coruña, 1955)
Mª José Gimeno Aránguez
(Down Coruña)
Mª José Gimeno Aránguez
(Madrid – 1963)
Cándido Giráldez Otero
(Down Vigo)
Cándido Giráldez Otero
Sonia Caldas Novás
Únete a Down Galicia e doa para apoiar ás persoas con síndrome de Down. Contribúe a un cambio nas súas vidas.
Contigo, medramos!