Trátase dunha lei segregadora que establece itinerarios excluíntes e que selecciona e clasifica ao alumnado, perdendo a Educación o seu carácter compensador. Provoca, ademais, un retroceso irreversible nos pasos e avances acadados en materia de integración escolar. A introdución das reválidas (5 probas externas: en 3º e 4º da ESO e ao acabar o Bacharelato) e da segregación do alumnado desde 1º da ESO son unha das medidas que máis dano van facer ao sistema educativo e ao alumnado en xeral, e ao que ten necesidades específicas en particular. Tras as reválidas de 3º e 6º de primaria, con carácter “orientador” para os centros e as familias, pódese producir un feito insólito: aos 11 ou 12 anos, tras cursas primeiro da ESO sen acadar os obxectivos do curso, un mozo ou moza pode ser catalogado como “inservible” para continuar os estudos, ser segregado e, polo tanto, derivado cara a exclusión educativa de por vida. Esta segregación, vulnera a igualdade de oportunidades na cal debe basearse un sistema educativo de calidade. A pesar de que a nova lei emprega na súa redacción termos como equidade, non discriminación e inclusión, esta clasificará ao alumnado en función dos seus resultados académicos e non polo seu desenvolvemento integral, co que aqueles que non rocen a excelencia verán minguado as súas opcións educativas. Por esta e por outras cuestións discriminatorias, a Federación Down Galicia rexeita de pleno a Lei Orgánica para a Mellora da Calidade Educativa (LOMCE), xa que considera que levará consigo graves prexuízos  para a comunidade educativa, en xeral, e as persoas con discapacidade intelectual, en particular. Así mesmo, esta lei non garante que aquelas persoas con dificultades na aprendizaxe conten coa atención axeitada, provocando así que a calidade educativa descenda enormemente, e non rexeita a idea de favorecer a especialización dos centros. Por isto e porque considera que a LOMCE vulnera a calidade da Ensinanza Pública e non supón ningunha solución aos problemas reais da educación no noso país, a Federación Down Galicia apoia as reivindicacións dos profesionais educativos e secunda a folga xeral convocada para mañá 24 de outubro a nivel estatal.