“Con estas prácticas demostramos as nosas capacidades e poderemos defender o noso dereito a traballar e a ter as mesmas oportunidades que calquera persoa”. Así o expresou Carlota Rodríguez López, moza con síndrome de Down participante no programa formativo, que interveu no acto de presentación no nome dos seus compañeiros e compañeiras. Este programa, pioneiro en España, ten por obxectivo promover a inclusión socio-laboral das persoas participantes, a través da realización de prácticas formativas en catorce oficinas galegas da entidade bancaria. Enmarcado no programa `Emprego con Apoio´, os mozos e mozas participantes adquirirán unha experiencia laboral que lles axudará no proceso de busca de emprego, ademais de mellorar as súas habilidades sociais para a súa integración en diferentes equipos de traballo. Os 21 participantes traballarán en sesións de catro horas diarias durante un período de 2 meses cada un, en actividades administrativas: arquivar e destruír documentos, fotocopiar expedientes e documentacións diversas, ordenar fichas de sinaturas, arquivar contratos e documentación xerada no día e tratar recibos, entre outras funcións. O presidente de Down Galicia, Delmiro Prieto, destacou que “o principal valor deste programa reside na visibilidade que outorga ás persoas que participan no mesmo, posto que poderán ser percibidas polo público, os clientes do banco, e os compañeiros de oficina, como persoas útiles e capaces”. Mentres, o director da Territorial Noroeste de BBVA, Juan Carlos Hidalgo, sinalou que se senten “especialmente orgullosos desta iniciativa, impulsada pola Oficina de Voluntarios do Banco, porque a nosa vocación é traballar por un futuro mellor para as persoas e, neste caso, para os nosos novos compañeiros. A experiencia deste programa nesta comunidade, que foi onde se iniciou, e posteriormente en Asturias e Castela e León, permíteme afirmar que estas prácticas serán moi enriquecedoras tanto para os participantes como para os empregados” O programa de prácticas foi presentado hoxe en Santiago de Compostela e contou coa presenza de Carmen Bouso, directora Xeral de Traballo e Economía Social da Xunta de Galicia.