Down Galicia e Clece alíanse para promover a inclusión laboral das persoas con discapacidade intelectual
Un total de 26 persoas de seis entidades Down en Galicia presentaron a solicitude para concorrer ás probas do proceso selectivo para ingreso como persoal laboral fixo coa categoría de Axudante de Xestión e Servizos Comúns (ordenanza), en prazas para ser cubertas por persoas que acrediten discapacidade intelectual. A convocatoria, realizada polo Ministerio de Facenda e Administracións Públicas, está destinada a cubrir un total de 15 prazas no conxunto do Estado español, das cales 3 corresponden ao ámbito autonómico galego, concretamente nas cidades de Vigo, Ourense e A Coruña. As persoas que están a preparar estas probas, e en espera de que saia publicada a listaxe de admitidos e excluídos, corresponden ás entidades Down en Ferrol, A Coruña, Santiago de Compostela, Lugo, Ourense e Vigo. Convocatoria da Deputación de Pontevedra Pola súa banda, 9 persoas da Asociación Down Pontevedra “Xuntos” e 7 da Asociación Down Vigo están a preparar as probas correspondentes á convocatoria pública de selección do persoal que integrará a bolsa de emprego da Deputación de Pontevedra para contratacións laborais temporais. Esta convocatoria contempla no punto 6 de postos ofertados, a categoría de Ordenanza reservado para persoas con discapacidade intelectual, grupo E, sendo a primeira vez que a Deputación provincial convoca estes postos especificamente para persoas con discapacidade intelectual. Discapacidade intelectual e acceso ao emprego público A convocatoria de oposicións en quenda única e independente para persoas con discapacidade intelectual é unha vella reivindicación das entidades que representan a este colectivo. A Administración central, convocara por primeira vez un proceso selectivo deste tipo no ano 2012, que ofertaba 3 prazas de ordenanza para a Comunidade Autónoma de Galicia, 2 na Coruña e 1 en Lugo. Naquela ocasión, Mauro Rodríguez acadara o posto de Lugo, converténdose no primeiro galego coa síndrome de Down que acadaba unha praza nunha oposición convocada polo Estado. – Posteriormente, no ano 2013 realizárase outra convocatoria destas características pero non contemplaba prazas para Galicia-. O feito de que ata entón as convocatorias se fixeran conxuntamente para o colectivo de persoas con algunha discapacidade – xa fose intelectual, física ou sensorial-, implicaba que non se tiña en conta que as dificultades dos diferentes grupos de persoas con discapacidade non son as mesmas. Considerando que cada tipo de discapacidade ten unhas particularidades propias, Down Galicia sempre reclamou que as adaptacións nas probas de acceso fosen específicas para cada grupo, xa que non é posible unha equiparación real de oportunidades de non terse en conta as diferenzas de partida. A ausencia de adaptacións nos procesos de selección para os distintos grupos de persoas con diversidade funcional, fixo que as persoas con discapacidade intelectual sempre quedaran excluídas como beneficiarias do acceso ao emprego público.
Entradas relacionadas
