A directora xeral de Xuventude e Voluntariado, Cecilia Vázquez, e o presidente de Down Galicia, Delmiro Prieto, puxeron esta mañá o broche final ó obradoiro de fotografía “O meu mundo en fotos” coa entrega dos diplomas ós participantes no proxecto. Esta actividade, organizada por Down Galicia, está subvencionada pola Consellería de Traballo e Benestar, que destinou 4.000 euros a través do programa Iniciativa Xove para a súa posta en marcha. O seu principal obxectivo é favorecer a participación das persoas coa síndrome de Down e/ou discapacidade intelectual en actividades sociais, culturais e de lecer, das que na maioría das ocasións están totalmente á marxe provocando un alto risco de exclusión social. Este proxecto, no que participan 33 persoas coa síndrome de Down e/ou discapacidade intelectual de todas as entidades Down de Galicia, está composto por un obradoiro de iniciación á fotografía, a planificación das sesións de fotografía na rúa, as propias sesións e o visionado, análise e presentación dos traballos realizados por cada participante nunha sesión conxunta.