Un total de 33 persoas coa síndrome de Down e/ou discapacidade intelectual, usuarias do Servizo de Orientación Laboral de Down Galicia (centro colaborador do Servizo Público de Emprego de Galicia), participaron en 2015 en diversas accións formativas de xeito totalmente inclusivo. As orientadoras laborais deste servizo, cofinanciado pola Consellería de Economía, Emprego e Industria -Dirección Xeral de Orientación e Promoción Laboral- e o Fondo Social Europeo, foron as encargadas de informar ós usuarios e ás usuarias das características destas formacións, da xestión das inscricións e do seguimento posterior de cada un dos participantes. Dentro destes cursos formativos englóbanse as Accións Formativas para Desempregados (AFD), os Programas Integrados para o Emprego (PIPE) e os Obradoiros de emprego. Participación nas accións formativas 25 persoas pertencentes ás entidades Down en Galicia participaron en Accións Formativas para Desempregados. Os AFD son formacións dirixidas prioritariamente a persoas traballadoras desempregadas e orientadas á obtención dun Certificado de Profesionalidade. Estes cursos permiten que as persoas participantes poidan aprender un oficio, especializarse dentro dun sector ou ampliar coñecementos que xa tiñan. “Operacións auxiliares de servizos de administración e xerais”, “Operacións de gravación e tratamento de datos e documentos” e “Operacións básicas de cociña” concentran o maior número de participantes, con 5 cada un. Séguenlles, “Operacións básicas de restaurante e bar” e “Traballos en carpintería e moble”, con 3, “Atención sociosanitaria a persoas dependentes en institucións sociais”, con 2, e “Operacións básicas de catering” e “Xestión de residuos urbanos e industriais” con un participante cada un. Tralas sesións formativas, as persoas participantes puxeron en práctica os seus coñecementos en concellos, entidades do terceiro sector, academias, centros de formación, restaurantes, xestorías e centros ocupacionais. Así mesmo, outras 7 persoas tiveron a oportunidade de formarse a través de Programas Integrados para o Emprego (PIPE), que teñen como finalidade mellorar a súa ocupabilidade e inserción laboral mediante a posta en marcha de plans integrais que combinan accións de diversa natureza, tales como información, orientación e asesoramento, formación, práctica laboral, prospección de empresas e intermediación laboral, e mobilidade xeográfica. Ademais, 1 persoa foi seleccionada para o Obradoiro de Emprego do Concello de Redondela.