A Consellería de Política Social colabora con varios programas formativos da Federación
Baixo o lema “A vida non vai de cromosomas”, as persoas usuarias de Down Lugo, mozos e mozas coa síndrome de Down e/ou discapacidade intelectual, deron lectura nos actos de celebración do Día Mundial da Síndrome de Down e do XX aniversario da Asociación Down Lugo ao Manifesto pola Autonomía Persoal, no que reclamaron os seus dereitos e reafirmáronse como persoas útiles para a sociedade. “As persoas coa síndrome de Down somos seres humanos dignos de todo dereito. Non queremos compaixón nin ningún tipo de segregación. Queremos o noso espazo e ser considerados un cidadán máis nesta sociedade que tamén é nosa”. A lectura do manifesto quedou englobada nun acto colorido e visual, no que se intercalaron números musicais, vídeos e divertidas actuacións. O evento, que tivo lugar no Salón Regio do Círculo de las Artes de Lugo, contou coa presenza do subdelegado do Goberno en Lugo, Ramón Carballo Páez, o conselleiro de Política Social, José Manuel Rey Varela, a alcaldesa de Lugo, Lara Méndez López, e os presidentes de Down Lugo, Mª José Blanco Freire, e de Down Galicia, Delmiro Prieto González. Durante a súa intervención, María José Blanco puxo de manifesto a necesidade de que as persoas coa síndrome de Down teñan voz propia e conten con oportunidades para facerse oír. “Porque as persoas con síndrome de Down, como calquera outra persoa, deben poder optar a un futuro digno e poder vivir de acordo cos seus anhelos e desexos”. Pola súa banda, o presidente de Down Galicia, Delmiro Prieto, fixo un breve repaso ás normativas que actualmente están restrinxindo os dereitos das persoas coa síndrome de Down, como son a LOMCE, para a que pediu a súa inmediata derogación, ou os procesos de incapacitación xurídica e recordou a importancia que teñen as convocatorias de emprego público por parte da Administración. No final da súa intervención agradeceu toda a colaboración recibida para poñer en valor as capacidades das persoas coa síndrome de Down e facelas máis visibles. Premios Down Galicia Down Galicia entregou, nesta edición, os III Premios Down Galicia, que teñen por obxecto recoñecer o labor a prol da promoción da autonomía e igualdade das persoas coa síndrome de Down, realizado tanto por institucións e entidades como por persoas particulares. O premio na categoría institucional foille concedido á Fundación Alcoa, polo seu apoio continuado a través de programas de voluntariado dende hai máis de 10 anos. Mentres, na categoría de persoa particular, o galardón foille concedido a Gonzalo Corredoira, delegado provincial de Gadisa, pola súa implicación co programa de Emprego con Apoio de Down Lugo. O premio consiste nun recoñecemento simbólico e na entrega dunha figura representativa da imaxe Down realizada polo artesán galego Fernando Porto. Iluminación dos principais monumentos de Galicia Os principais monumentos das sete grandes cidades de Galicia conmemorarán hoxe o Día Mundial da síndrome de Down. A Torre de Hércules en A Coruña, a Cidade da Cultura, o Concello, o Hostal dos Reis Católicos e o Colexio de San Xerome en Santiago de Compostela, o Concello de Ferrol, as Murallas romanas e o edificio da Deputación en Lugo, as Burgas de Ourense, as fontes da Rúa Aragón en Vigo e os edificios do Concello e da Deputación en Pontevedra serán iluminados de azul este luns 21 de marzo. Nacións Unidas aprobou en novembro de 2011 a declaración do 21 de marzo como Día Mundial da síndrome de Down. Establécese esta data, o 21 de marzo [21/03] como un símbolo, en referencia á triplicación [trisomía] do cromosoma 21 que se traduce na condición xenética da síndrome de Down.
Entradas relacionadas
