O proxecto Down Café, un paso máis cerca de converterse en realidade
Aos seus 25 anos, Alejandro Nieto conta cunha bagaxe laboral impoñente, xa que desde que comezou a súa andaina laboral con 20 anos, traballou en varias empresas da zona de Ourense e desempeñou diferentes tarefas en diversos postos.
Actualmente, compaxina un contrato temporal como repoñedor na empresa Feuvert con outro en Domino’s Pizza (Zena Alsea).
Nesta última comezou a traballar o pasado 4 de decembro, converténdose na primeira persoa con discapacidade intelectual que Domino’s Pizza contrata en España. Durante a súa media xornada semanal monta caixas para pizzas, prepara os complementos, aprovisiona o local de material e de produtos necesarios, lava os utensilios, limpa as superficies e céntrase na atención ao cliente. Nestes momentos estase a preparar como “líder de sala” para recibir aos clientes cando entran no local e dirixilos ao mostrador ou ás mesas.
Ao preguntarlle polo que máis lle gusta, non dubida en responder que “todo”, pero resaltando sobre todo “o ambiente de traballo e a realización de tarefas moi diferentes”. En canto ao que menos, tras pensalo un pouco, di que non ten nada que dicir en negativo. Alejandro descríbese como un rapaz ao que lle gusta “facer e probar cousas novas”. Non lle importa pasar por diferentes traballos ata encontrar o máis axeitado, aínda que cree que xa o atopou en Domino’s.
Alejandro valora a súa inserción en Domino´s Ourense como “estupenda e marabillosa” e di que “da gusto ir a traballar todos os días porque os compañeiros acolléronme moi ben dende o primeiro día”.
Os seus compañeiros e compañeiras, pola súa banda, destacan o seu esforzo e salientan que “traballar con el é admirable porque demostra a cada momento o importante que é manter unha actitude positiva”. Valoran de xeito favorable a súa incorporación porque “o seu carisma fai que medre o compañeirismo”.
No caso de algún deles, esta é a primeira vez que traballan con unha persoa con discapacidade intelectual. Pensaban que Alejandro “tardaría en adaptarse polo ambiente tan dinámico que hai na tenda”, pero comprobaron que con forza, gañas e ilusión todo é posible.
Primeira contratación en Domino’s España
O principal promotor desta inserción é Joshua Pazos, xerente de Domino’s Pizza Ourense, que apostou desde o primeiro momento pola incorporación de Alejandro ao seu equipo de profesionais. Recoñece que non coñecía Down Ourense e que non se imaxinaba a cantidade de traballo e de persoas traballadoras que se dedican a formar, apoiar e valorar ás persoas usuarias da entidade. Comenta que se decidiron polo seu programa de Emprego con apoio porque lles pareceu “moi interesante poder seguir formándose con vistas a seguir crecendo no ámbito persoal e profesional”. Ademais, ter unha persoa de apoio solucionoulles “moitas dúbidas e mitigou os medos que sempre existen ao comezo nestas novas contratacións”.
Joshua Pazos considera que Alejandro “é un motivador” e que a súa contratación mellorou directamente o ambiente de traballo. Cre que tiñan “un grupo moi ben formado e con capacidade para asumir diferentes retos, pero el non fai máis que sorprendernos e axudarnos a ver o noso día a día de xeito diferente, así como a tomarnos cada tarefa con máis ganas”. O xerente desfáise en eloxios cara Alejandro, do que destaca que “sempre ten unha actitude positiva e gañadora, unha gran capacidade de esforzo, un innato don de xentes,… é o compañeiro total!”.
Esta incorporación é a primeira en Domino’s Pizza a nivel estatal. Pazos cre que non será a única, posto que xa mantivo conversas con outros compañeiros e compañeiras e, “aínda que moitos saben que a complexidade nun inicio é algo maior, teñen moitas gañas de seguir crecendo e aprendendo”.
Pazos non dubida en recomendar o Emprego con Apoio a aquelas empresas que teñen dúbidas á hora de incorporar aos seus equipos de traballo a unha persoa coa síndrome de Down ou con outra discapacidade intelectual. Ten claro que “hai que estar moi seguros de estar interesados na súa incorporación porque, ao final, que estes novos compañeiros ou compañeiras se adapten ou non depende moito da nosa actitude”. Recomenda ferventemente darlle unha oportunidade ás persoas con discapacidade intelectual, xa que no seu caso “só achegou cousas positivas, tanto no laboral coma no persoal” e espera que “esta relación entre Domino’s Pizza e Down Ourense non fixera máis que comezar”.
Entradas relacionadas
