A Deputación de Ourense apoia de novo a inserción laboral das persoas coa síndrome de Down da provincia
Prácticas laborais no estranxeiro? Samuel Molanes e Isaac Fernández, dous mozos membros de Down Vigo, acábannos de demostrar que é posible.
Grazas ao programa europeo Valuable Network, ambos puideron viaxar ata a capital italiana da moda para adquirir coñecementos e experiencias no campo da hostalería. Durante as últimas tres semanas, o Hotel Meliá Milano foi o lugar de traballo no que Samuel e Isaac puideron mellorar as súas habilidades como camareiro e auxiliar de cociña, respectivamente.
Acompañados de Eva Alonso, a súa preparadora laboral, estes dous mozos viviron unha experiencia única e moi enriquecedora onde, ademais de aprender todo o necesario para poder desempeñar o seu traballo en calquera establecemento hostaleiro, adquiriron habilidades que lles permitirán ser máis autónomos e independentes.
En realidade, a aprendizaxe comezou xa un mes antes de viaxar á cidade italiana, cando ambos comezaron a estudar o idioma para poder integrarse mellor no persoal de traballo do hotel.
Unha vez en Milán, contaron co apoio da súa preparadora laboral, quen reforzou as explicacións das súas tarefas e facilitou a relación cos seus compañeiros e compañeiras e cos seus superiores. Esta metodoloxía é o que se coñece como Emprego con Apoio, unha modalidade de inserción laboral onde o preparador laboral acompaña ao traballador con discapacidade en todo o seu proceso de integración no posto de traballo, modulando o apoio atendendo á súa adaptación ao posto e potenciando os apoios naturais na empresa (con xefes e xefas, compañeiros e compañeiras de traballo, persoal encargado,…).
Unha vez finalizada a experiencia, Samuel quere “dar as grazas ao Hotel Meliá Milano e a Valuable Network pola oportunidade de vivir esta incrible aventura”. Isaac, pola súa banda, destaca que aprendeu “moitas cousas novas en Milán” e quere agradecerllo “ao hotel, á nosa responsable de emprego e ao noso xefe”.
Pero estas prácticas non marcaron soamente a vida destes mozos, senón tamén a da súa preparadora laboral. “É unha das vivencias máis importantes e que máis me marcaron como preparadora laboral nos 16 anos que levo traballando coa metodoloxía de Emprego con Apoio”, indica Eva Alonso. “É unha vivencia tan intensa como gratificante e creo que marcará tamén a vida tanto persoal como laboral de Samuel e Isaac”, termina.
A maiores da experiencia laboral, Samuel e Isaac veñen coa maleta chea de novas experiencias e vivencias. Aínda que de luns a venres os mozos dedicábanse por completo ás súas novas tarefas, ambos gozaron de algo de tempo libre para o lecer e o turismo, podendo coñecer, ademais de Milán, lugares tan emblemáticos como o Lago Como ou Lugano e gozando da deliciosa gastronomía italiana.
Ademais, a sorte quixo que o establecemento hostaleiro estivese preto do estadio de San Siro, polo que estes vigueses afeccionados ao fútbol puideron gozar das visitas de xogadores e adestradores de primeiro nivel como Leo Messi, Denís Suárez ou Quique Setién.
Programa Europeo Valuable Network
Estas prácticas laborais son unha das accións que o programa europeo Valueable Network incorporou recentemente e que naceu para fomentar a inserción laboral das persoas coa síndrome de Down e outras discapacidades intelectuais en hoteis, bares e restaurantes de toda Europa. Na actualidade, esta rede europea, que está financiada pola Comisión Europea a través do programa Erasmus+, está formada por máis de 80 establecementos de 6 países europeos (España, Portugal, Italia, Alemaña, Hungría e Turquía).
Entradas relacionadas
