Ante a declaración do estado de alarma e as recomendacións e medidas tomadas polo Goberno en relación á emerxencia sanitaria do COVID-19, a Federación Down Galicia e as súas entidades membro suspenderon o pasado 13 de marzo as actividades e os servizos presenciais prestados ás persoas usuarias.
Pero aínda que as portas das entidades Down permanecen pechadas desde entón, os equipos profesionais das mesmas continúan traballando a distancia para ofrecer ás persoas coa síndrome de Down e outras discapacidades intelectuais e ás súas familias, apoio e diferentes recursos para dar resposta ás súas necesidades.
Deste xeito, a Federación e a súas sete entidades están a realizar un seguimento semanal con todas as familias socias e contan cun servizo de apoio e consulta telefónica e online, e nalgún caso a través de whatsapp, ao que calquera persoa usuaria ou familia pode dirixirse en calquera momento en caso de precisalo.
Así mesmo, os e as profesionais das distintas áreas que conforman o Servicio de Promoción da Autonomía Persoal (SEPAP) das entidades ofrecen sesións virtuais e actividades a distancia a través de distintas plataformas e aplicacións para que as persoas usuarias poidan continuar, dentro do posible, co ritmo habitual de sesións.
Por último, tamén están a enviar material e vídeos de apoio para traballar de forma individual desde a casa e a realizar retos e actividades a través das redes sociais para fomentar a actividade física e mental nestes días de confinamento.
A Federación, pola súa parte, creou o apartado web “Recursos Down”, onde públicos de todas as idades, con e sen discapacidade, poderán atopar nun mesmo lugar actividades, xogos, contidos audiovisuais, contos, aplicacións web e móbiles de interese, enlaces directos a conferencias online, centos de ideas para levar a cabo no seu tempo de lecer e varias pautas e recomendacións para estes días que nos está tocando vivir.
Desde Down Galicia queremos agradecer o esforzo e a dedicación de todos e todas as profesionais que conforman o Movemento Down, que están a conseguir que persoas usuarias e as súas familias se sintan apoiadas e noten o menos posible a falta de servizos e actividades presenciais nas entidades.
Contacto entidades Down:
| Federación Down Galicia 981 58 11 67 downgalicia@downgalicia.org |
Down Vigo 986 20 16 56 downvigo@downvigo.org |
| Down Pontevedra “Xuntos” 986 86 55 38 xuntos@downgalicia.org |
Teima Down Ferrol 981 32 22 30 teimadownferrol@teimadownferrol.org |
| Down Lugo 982 24 09 21 downlugo@downlugo.org |
Fundación Down Compostela 981 56 34 34 downcompostela@downcompostela.org |
| Down Coruña 981 26 33 88 asociacion@downcoruna.org |
Down Ourense 988 37 03 13 downourense@downgalicia.org |