A Fundación Down Compostela recibiu o recoñecemento á Acción Social nos Premios Alfredo Iglesias 2026, que se entregaron o pasado venres 16 de xaneiro no Hotel Congreso de Teo. Estes galardóns, que celebran a súa quinta edición, salientan a traxectoria de persoas e organizacións que contribúen de xeito destacado á cultura, á lingua e ao compromiso social no en Galicia.
O xurado destes premios, impulsados polo teense Álex Regueiro en lembranza do creador Alfredo Iglesias, distinguiu a Down Compostela no eido social polo traballo continuado da entidade a favor da inclusión e da visibilidade das persoas coa síndrome de Down e discapacidade intelectual. Este recoñecemento súmase ao labor diario da organización, que loita pola participación plena das persoas usuarias en todos os ámbitos da vida.
Na gala, á que asistiron un amplo número de representantes culturais, sociais e institucionais, tamén recibiron premios outras figuras e proxectos en áreas como as artes, o patrimonio, a ciencia e o compromiso social. A presenza de Down Compostela nesta relación de premiados refrenda o papel transformador da entidade no tecido comunitario galego.
Para Down Compostela, este galardón supón un impulso adicional para seguir promovendo a inclusión, o desenvolvemento de competencias e a visibilidade das persoas con síndrome de Down. A entidade quere compartir este recoñecemento con todas as familias, profesionais e persoas usuarias que fan posible cada día unha vida máis activa e autónoma.
Premios Alfredo Iglesias 2026:
- Acción Cultural – Casa Museo Rosalía de Castro
- Acción Patrimonial – Museo do Pobo Galego
- Acción Social – Fundación Down Compostela
- Acción Solidaria – Leila Nachawati
- Arte – Fuco Reyes
- Artesanía – Idoia Cuesta
- Artista Revelación – Eris Mackenzie
- Ciencia – Jorge Mira
- Comunicación – Tareixa Navaza
- Escrita – Paula Carballeira
- Gastronomía – La Central Heladera
- Ilustración – Kiko da Silva
- Memoria – José Luis Míguez Abucide
- Moda – Katuxa Platero
- Música – Wöyza
- Personaxe Revelación – Marisa Prisa
- Promoción da Lingua – Esther Estévez
- Traxectoria – Maca Reimóndez e Carmen Fernández