A profesora do colexio Pío XII de Santiago, María García Quintas, a empresa biomédica Keramat e a Asociación Cultural Rosalía de Castro de Cacheiras, foron os galardoados nesta edición. Na gala de entrega organizada pola Fundación Down Compostela no Hostal dos Reis Católicos, os mozos e mozas con trisomía 21 tiveron un papel protagonista. Carlota Rodríguez foi a encargada de dar a benvida a todos os asistentes e presentar á condutora da gala, a xornalista Silvana Moril. A moza enviou un das mensaxes importantes da noite en favor da integración “é importante que toda a sociedade, que todos vos, tomedes conciencia de que sen a vosa axuda e implicación, a normalización da vida das persoas con discapacidade nunca será completa”. Carla Lojo, alumna dos cursos que imparte a asociación Rosalía de Castro, presentou o premio ao colectivo e resumiu, en primeira persoa, os motivos deste galardón: “Neste grupo de baile e pandeireta, para bailar, nos somos unha máis; para tocar, nos somos unha máis; e para actuar, nos somos unha máis. Isto si é inclusión”. A vocal da Xunta directiva da asociación, Carmen Leborán,  que recolleu o premio, apelou á “normalidade que pouco a pouco se vai establecendo para as persoas con discapacidade” e incluíuse entre o colectivo con discapacidade para concluír que “nos vémonos como un máis na sociedade e queremos os nosos sitios nela e os nosos dereitos”. Carmiña Romero tomou a palabra para falar da súa profesora, María García Quintas, docente de audición e linguaxe do colexio Pío XII de Santiago, que deu clase a gran parte dos mozos e mozas que conforman a Fundación Down Compostela. Pola súa parte, María García, que amosou o seu agradecemento aos seus alumnos e a  Down Compostela,  insistiu en que “tratei de demostrar que é posible lograr a inclusión real dos alumnos con discapacidade intelectual en xeral e coa síndrome de Down en particular”. O último galardón da noite, outorgado aos laboratorios farmacéuticos Keramat presentouno Javier Prieto, que relatou o traballo da empresa en favor da inclusión laboral das persoas coa síndrome de Down. O conselleiro delegado de Keramat, Miguel Souto, recolleu o premio de mans do seu empregado Francisco Fianza e dirixiuse ás empresas para pedirlles “que perdan o medo a empregar a persoas como Fran, cunha altísima profesionalidade. Non se van arrepentir”. Ademais insistiu na idea de que “a labor que realizan los premiados de hoxe debería ser o normal” e bromeou engadindo: “por iso nun primeiro momento non entendiamos por que nos premiaban”.