O Grupo de Teatro de Down Compostela, composto por mozos e mozas coa Síndrome de Down e discapacidade intelectual dirixidos por Lucas Herrador, estrea o 27 de xuño, ás 21.00 horas, a obra “As probas de Hércules” no Salón Teatro de Santiago de Compostela. O acceso á sala será libre, previa retirada da correspondente entrada nas billeteiras do Salón Teatro. Lucas Herrador, destaca que despois das cinco obras xa representantes polo grupo de teatro, “mereciamos a homenaxe dun divertimento. Se Hollywood manexa os mitos gregos e romanos como mellor lle prace, por que nós non podemos facer algo parecido?”, pregúntase o director. Desta reflexión xurde a idea de poñer en escena ao máis famoso dos heroes helenos e o protagonista dun ciclo épico que leva as súas fazañas por todo o orbe coñecido dos antigos gregos. A partir do mito de Hércules e dos caprichosos deuses que, “aburridos no seu Olimpo deciden xogar coa vida dun mortal, quixemos facer unha obra que sirva para divertir a espectadores e actores”, engade o director. Financiada pola Fundación Down Compostela, os mozos e mozas do grupo de teatro levan moitos meses ensaiando “As probas de Hércules”. “Un espectáculo con máis de vinte actores en escena require moitas horas de traballo previo. A representación non sería posible sen a implicación de profesionais e familiares de Down Compostela que buscaron un oco nas súas axendas para botar unha man e que podamos estrear a obra”, conclúe Lucas Herrador.