Das 110 probas ás que se presentaron acadaron o resultado positivo “Apto” en 80 delas, o que supón un 72,7% de aprobados. A estes exames de Competencias Clave, realizados o pasado 24 de maio en Silleda, concorreron un total de 48 persoas das entidades Down de Ferrol, A Coruña, Santiago de Compostela, Lugo, Pontevedra e Vigo. As persoas coa síndrome de Down e con discapacidade intelectual examináronse en igualdade de condicións que o resto de persoas que se presentaban, coas únicas adaptacións á metodoloxía de Lectura Fácil (para facilitar a comprensión das preguntas e dos textos) e na ampliación do tempo para cada exame. Neste sentido, as entidades Down en Galicia destacan a importancia de concorrer a este tipo de probas a través do sistema ordinario. Asegúrase, deste xeito, a inclusión social atendendo á diversidade de cada individuo, e garantindo que todas as persoas teñan iguais oportunidades de acceso e participación en idénticas circunstancias. As probas de Competencias Clave Son os requisitos formativos que asegurarán que o alumnado posúe os coñecementos para acceder aos cursos correspondentes aos novos certificados de profesionalidade de nivel de cualificación 2 e 3. Hai 4 competencias clave (lingua galega, española, estranxeira, e matemáticas) e para cada unha hai dous niveis. O nivel 2 correspóndese co título de Graduado en Educación Secundaria ou equivalente, e o nivel 3 correspóndese con Bacharelato ou equivalente. Concretamente, as persoas das entidades Down que concorreron nesta ocasión presentáronse a 71 probas de nivel 2 e a 39 probas de nivel 3.