As entidades sociais continuarán pechadas ata que a Xunta de Galicia considere viable a súa reapertura
Down Galicia vén de recibir o premio da Fundación Randstad na categoría Institucional grazas ao seu proxecto “Potenciando o talento profesional: emprego con apoio”. A secretaría técnica de selección de premiados valorou a ampla traxectoria de Down Galicia a prol da inclusión social, o seu grao de asociacionismo e colaboración, o rigor do proxecto, os indicadores e obxectivos de medición de impactos e o grao de innovación desenvolvido no proxecto, en sectores non tradicionais. Os galardóns, que se entregaron no Casino de Madrid, recoñecen o labor de empresas, medios de comunicación, institucións e profesionais que teñan desenvolvido iniciativas a favor da integración social e laboral de colectivos en risco de exclusión. O vicepresidente de Down Galicia, Manuel Pérez Cabo, foi o encargado de recoller o premio no nome da Federación e aproveitou a súa intervención para agradecer o recoñecemento, ao tempo que fixo fincapé na necesidade de implicar a toda a sociedade para que as persoas con discapacidade poidan acceder ao mercado laboral de xeito normalizado. O proxecto de emprego de Down Galicia púxose en marcha no ano 2.002 e está orientado a facilitar que as persoas con discapacidade teñan un traballo en empresas ordinarias. Para que estas insercións sexan efectivas cóntase coa figura dun preparador ou preparadora laboral (profesional que se encarga de ensinar as tarefas á persoa con discapacidade no posto de traballo), e que non supón custe algún para a empresa. Este tipo de apoio no posto é gradual e vaise retirando ata desaparecer por completo a medida que a persoa con discapacidade vai adquirindo autonomía nas súas tarefas. Os Premios Fundación Randstad chegan este ano á súa X edición e contan co apoio do Instituto Complutense de Estudios Internacionales e do Real Patronato sobre la Discapaciad, entidade dependente do Ministerio de Sanidad, Servicios Sociales e Igualdad. Nesta edición tamén foron premiados a compañía de alimentación e bebidas Calidad Pascual na categoría de Empresa, pola incorporación de persoas con discapacidade á súa plantilla; EFE Radio na categoría de Medios de Comunicación, polos programas “Radio o lo que sea”, “Somos capaces” e o seu Taller de Radio; e Juan José Bilbao na categoría Mención de Honor, polo deseño de EsAccesible App.
Entradas relacionadas
