A presidenta de Teima, Patricia Serantes, e o alcalde de Narón, José Manuel Blanco, asinaron o pasado xoves un convenio mediante o cal o Concello naronés destinará 10.000€ para apoiar os programas levados a cabo pola Asociación. Teima ofrece un servizo de apoios estruturados ás persoas coa síndrome de Down e/ou discapacidade intelectual, para mellorar a súa calidade de vida a través dunha inclusión plena e efectiva na sociedade. Neste sentido, áreas como a escolarización en centros de ensino ordinarios ou a inserción laboral en empresas privadas da súa contorna, son dous expoñentes da súa filosofía de traballo. Ao igual que todas as entidades do Movemento Down Galicia, Teima utiliza os recursos da comunidade de xeito que respondan ás necesidades reais de toda a diversidade social. A este acto tamén asistiu a concelleira de Promoción Social e Igualdade, Teresa Sabio. A Fundación Alcampo apoia o proxecto “Inclúyeme: uno más en la vida escolar” Por outra parte, a Fundación Alcampo por la Juventud fixo entrega o pasado venres dun cheque por valor de 12.000€ para a posta en marcha do proxecto “Inclúyeme: uno más en la vida escolar”. Este proxecto está enfocado á coordinación, asesoramento e sensibilización do entorno educativo, co obxecto de promover a inclusión escolar de persoas coa síndrome de Down e/ou discapacidade intelectual. A cantidade doada por Alcampo será destinada á elaboración e adaptación de materiais educativos accesibles.   FOTO: Diario de Ferrol