Cunha achega de 2.564€, a Deputación de Pontevedra continúa colaborando co proxecto “Talento profesional: Emprego con apoio para persoas coa síndrome de Down e/ou discapacidade intelectual” que pon en marcha Down Galicia na provincia de Pontevedra. Esta colaboración permitiu que un total de 104 persoas coa síndrome de Down e discapacidade intelectual contaran cunha serie de apoios encamiñados a conseguir a súa inclusión no mercado laboral ordinario durante o ano 2015. Grazas a esta axuda prestáronse apoios por toda a provincia, especialmente na capital e nas cidades e concellos máis importantes, aínda que tamén naquelas áreas xeográficas ás que pertencen os usuarios e usuarias do proxecto de emprego. Na área de influencia de Pontevedra, ademais da propia cidade do Lérez, pódense citar Redondela, Marín, Pontecaldelas, Cambados e Cuntis. Mentres, na área de Vigo, ademais da cidade olívica, destacan Mos, Redondela, Baiona, Ponteareas, Tomiño, Cangas ou Moaña, entre outros. O programa de “Emprego con Apoio” responde á reivindicación das persoas coa síndrome de Down ao seu dereito a traballar en ámbitos laborais normalizados e dispoñer de recursos que lles permitan acadar maiores cotas de autonomía e independencia. Así, Down Galicia facilita a inclusión social e laboral deste colectivo garantindo todos os apoios que tanto a persoa, como a familia e o empregador precisan. Desta forma, os usuarios e usuarias que se incorporan a un posto, contan co apoio dun preparador laboral encargado de levar a cabo unha formación específica no propio posto, desenvolvendo estratexias de aprendizaxe para que o usuario ou usuaria poida ir adquirindo progresivamente unha adecuada execución das tarefas. O apoio tamén se centra na potenciación da interacción social cos compañeiros e compañeiras de traballo e na mediación na relación con eles para que se desenvolva de forma positiva e natural.