Ilusionados e con ganas de demostrar a súa capacidades. Así iniciaron o pasado martes as súas prácticas formativas na Xunta de Galicia Elías Ledo, na Presidencia do goberno autonómico; Carlota Rodríguez, na Vicepresidencia, e Pamela Casagrande, no departamento de Política Social. Estas prácticas enmárcanse no convenio asinado o pasado 19 de febreiro entre a Consellería de Política Social e a Fundación Down Compostela, entre o conselleiro José Manuel Rey Varela e o presidente da Fundación, Juan Martínez. O obxectivo do convenio é facilitar aos tres novos seleccionados formación sobre aspectos como a estrutura xeral da Xunta de Galicia; as competencias atribuídas aos diferentes departamentos e entes; as funcións e os diferentes tipos de empregados públicos; o funcionamento dos sistemas de custodia e traslado de información e documentación entre distintos departamentos da administración autonómica, así como con persoas ou entidades alleas á mesma; e tarefas de apoio ao persoal de administración (reprografía, encadernación…). Pamela, Carlota e Elías realizarán estas prácticas ata o 31 de decembro do presente ano, realizando labores propios de ordenanzas nos diferentes departamentos do goberno autonómico. Durante o seu período de aprendizaxe estarán acompañados por un titor da Xunta e polas preparadoras laborais de Down Compostela. Os tres mozos realizarán as tarefas asignadas durante un máximo de 25 horas semanais, de luns a venres, dentro do horario habitual das diferentes consellerías.