Finalmente, foron 3.092 euros a cantidade recadada trala venda da Chocolatina Solidaria, iniciativa que xurdiu da colaboración entre Down Lugo e a Asociación Provincial de Empresarios de Confeitería, Pastelería, Bollería e Repostería da provincia, que tivo lugar o pasado día 21 de marzo. Esta mañá Honorio Gómez, presidente dos confeiteiros lucenses, entregaba a María José Blanco, presidenta de Down Lugo, o cheque que certificaba esta cantidade. Durante o acto de entrega, os dous representantes amosáronse moi satisfeitos co resultado e destacaron e agradeceron a colaboración de tódolos lucenses que compraron a chocolatina. Honorio Gómez asegurou que a iniciativa “tivo unha gran acollida e estamos encantados de ter participado nela”, mentres que María José Blanco destacou a “implicación de todo o mundo, sobre todo a dos pasteleiros, que estiveron dispostos a participar desde o primeiro momento”. A cantidade recadada –superior ó previsto inicialmente porque moitos lucenses aproveitaron para facer unha doazón a Down Lugo- servirá para mellorar o Servizo de Promoción da Autonomía Persoal da entidade, que presta servizo a 60 familias da provincia. A elaboración das 2600 chocolatinas correu a cargo de Pastelería Yomar, Confitería Mimos, Confitería Santos, Pastelería Martín, Confitería Mallorca, Pastelería Don León, Confitería Ramón e Confitería Madarro.