A Asociación de empresarios da pequena e mediana empresa de Pontevedra (A.E.M.P.E.) decidiu apostar por unha sociedade máis inclusiva coa firma dun convenio de colaboración con Down Pontevedra “Xuntos”, que promoverá a inclusión socio-laboral das persoas coa síndrome de Down e/ou discapacidade intelectual. A.E.M.P.E. comprométese por medio deste documento a dar difusión entre os seus asociados do Servizo de Emprego con Apoio de Down Pontevedra “Xuntos”. Este programa, común en todas as entidades Down de Galicia, ofrécelle ao empresario a posibilidade de contratar a persoas con discapacidade intelectual adecuadas para o posto e que, ademais, serán formadas por un preparador ou preparadora laboral que a entidade pon a disposición da empresa de modo gratuíto. O preparador ou preparadora laboral encargarase de levar a cabo unha formación específica no propio posto de traballo, para que o traballador ou traballadora poida ir adquirindo progresivamente unha adecuada execución das tarefas. O apoio tamén se centrará na potenciación da interacción social cos compañeiros e compañeiras de traballo e na mediación na relación con eles para que se desenvolva de maneira positiva e natural.