Feuvert, compañía líder no sector do mantemento do automóbil, é tamén un referente no campo da inclusión socio-laboral. Desde 2015 colabora, por propia iniciativa, co programa de Emprego con Apoio da Federación Down Galicia, mediante o que xa incorporaron ao seu equipo de traballo a 3 persoas coa síndrome de Down e/ou discapacidade intelectual. Dúas delas, recentemente renovadas, en tendas da Coruña e unha na cidade de Ourense. A súa cuarta incorporación na nosa comunidade será Saúl, un mozo lucense que empezará hoxe como axudante de tenda no local que Feuvert ten na cidade amurallada. As súas funcións, moi variadas, serán a recepción da mercadoría, a comprobación dos albarás, a reposición e colocación de produtos en tenda e a limpeza da mesma, entre outras. A nivel nacional, un total de 37 persoas con algún tipo de discapacidade forman parte actualmente do seu persoal, ben nas oficinas centrais ou ben nalgún dos 98 autocentros que a marca ten en España e Portugal. Por este motivo, a firma conseguiu recentemente o Certificado Discert, que recoñece a súa acción neste campo sen recorrer a medidas alternativas como a contratación de servizos a Centros Especiais de Emprego.