O próximo 17 de xuño terá lugar en Madrid un acto de mobilización que o CERMI estatal organizou para reivindicar o dereito ó voto para as máis de 80.000 persoas que no noso país teñen negado este dereito fundamental. O motivo que lles impedirá votar nas próximas Eleccións Xerais  do 26 de xuño é que todas elas contan cunha sentenza xudicial de incapacidade total, algo que sucede con certa frecuencia en familias que contan cunha persoa con discapacidade intelectual. Unha sentenza que lles afasta do dereito ó voto polo simple motivo de que a Lei Orgánica de Réxime Electoral Xeral (LOREG) non foi modificada, tal e como levamos anos solicitando as organizacións de discapacidade, de acordo ó que reflicte a Convención Internacional sobre os Dereitos das Persoas con Discapacidade e a propia ONU. Sería tan sinxelo como eliminar da devandita lei o artigo 3.2, que obriga ó xuíz a valorar a capacidade da persoa ó sufraxio ante unha sentenza de incapacitación xurídica. Neste acto, que se celebrará ás 11.00h. na Praza da Cortes da capital española, emitiranse declaracións de persoas con discapacidade que non poden votar, e convocarase aos medios de comunicación e a representantes de partidos políticos. Queremos animar a todas as persoas concienciadas contra esta vulneración a que se sumen á mobilización e participen, exercendo simbólicamente o seu dereito ao voto ante unha urna e mesa electoral que haberá preparadas alí, como símbolo de apoio a esas 80.000 persoas que teñen negado o seu dereito ao sufraxio. España desatende á ONU A propia Convención de Nacións Unidas obriga a España a modificar a lei baixo a premisa de que ningunha persoa por razóns de discapacidade pode ser privada deste dereito fundamental. E é que en 2011 a ONU examinou a España para comprobar o nivel de adaptación de máis de 90 normativas do noso país á Convención sobre os Dereitos das Persoas con Discapacidade. Foi entón cando Nacións Unidas advertiu ao Goberno de que non fixera os deberes en materia electoral ao non modificar a Lei. Recuperar o dereito ó voto Existen métodos para que as persoas con discapacidade recuperen o dereito a sufraxio que se lles arrebatou por sentenza xudicial de incapacitación. Para axudar a que o logren, Down Galicia recomenda o documento “Tes dereito a votar, que ninguén cho quite”; unha guía en Lectura Fácil editada polo CERMI que detalla os pasos para dar para recobralo e gozar así dun dereito fundamental que asiste a calquera ser humano. De todos os xeitos, Down Galicia e Down España lembran que a recomendación das organizacións ás familias é que non opten pola incapacitación xurídica, pois contravén o espírito da Convención. No caso de que sexa absolutamente necesario, o recomendable é que acudan primeiro a un fiscal especializado en discapacidade que corresponda á xurisdición da súa cidade ou provincia, para que poida analizar o caso, orientarlles e propoñer o procedemento máis axeitado. FOTO: Down Compostela