A Fundación Mapfre, a través da “VII convocatoria de axudas a proxectos sociais” colaborou con 4.000 euros no desenvolvemento do proxecto “Información, Orientación e Procura de Emprego para persoas con síndrome de Down e/ou discapacidade intelectual” que Down Galicia levou a cabo na comunidade autónoma galega.

O seu principal obxectivo é facilitar ás persoas coa síndrome de Down e/ou discapacidade intelectual en idade laboral, os apoios e recursos necesarios no ámbito da información, formación e orientación laboral.

A través deste proxecto, que tivo unha duración de 12 meses, Down Galicia desenvolveu accións dirixidas á adquisición das capacidades e habilidades básicas que permitiron aos demandantes de emprego coa síndrome de Down e/ou discapacidade intelectual articular itinerarios activos e eficaces na procura de emprego, así como garantir o mantemento do mesmo para aquelas persoas que xa se atopaban traballando.

Desta forma, leváronse a cabo talleres sobre autocoñecemento persoal, habilidades sociais, habilidades sociolaborais, autocoñecemento profesional, coñecemento das opcións de formación, coñecemento da contorna laboral, procura de perfís profesionais, normativa laboral e técnicas de procura de emprego, entre outros.

“Información, Orientación e Procura de Emprego para persoas coa síndrome de Down e/ou discapacidade intelectual” beneficiou durante o período mencionado a 375 persoas usuarias do servizo de orientación laboral da Federación Down Galicia.